PSG-in coach Tuchel an ban

Paris St-Germain chuan Nilaini zana Strasbourg 4-0 a an sawp atanga rei lo teah coach Thomas Tuchel an ban. Tuchel thlaktu tur a la chiang lo a, team enkawl nei loa awm mek Tottenham manager hlui Mauricio Pochettino chu Paris club nena sawizawm a ni.

German manager Tuchel hian 2018 June thla atang khan PSG hi a enkawl. Paris club hi Ligue 1 nomawi pahnih bakah French Cup leh French League Cup te a lakpui hman.

Season hmasa khan Champions League final an lut a, club dang aiin season an hmang rei. Tun season bul an tan tlai bik a, chawlh nei mumal loa inkhel zui an nih avangin beisei an phak lo, chetsual zauh zauh an ching.

Tun dinhmunah Ligue 1 table-ah pathumna an ni mek a, hmahruaitu Lyon an phak lohna chu point khat chauh a ni. UCL last 16 an lut tawh bawk a, Spanish club lian Barcelona nen an inhmachhawn dawn.

Unai Emery thlaktu Borussia Dortmund coach hlui Tuchel hian PSG tan tun season tawp thleng daih chauh contract a nei tawh a, a club hi chet chhiat pui viau lo mah se a chungah club thuneitu lamin zahngaihna an nei tawk lo niin a lang.

Season kal laiah PSG hi hliam vangin an buai hle a, a bik takin tlarhma player an inhliam chhawk a ni deuh ber. Pound maktaduai 200 man Neymar a hliam mek a, coach thar tan pawh awlsam taka team enkawl theih a ni dawn lo.