Man United tan thawhlehna ropui
An tho ta, an tho! Lyon hnehtu Manchester United an tho ta. Ningani zan khan Ruben Amorim-a hote Old Trafford-ah bul ṭan ṭha mah se a tawpah an tlu sawp a, beisei awm tawh lo hnuah an la tho chhuak tho. English club hian extra time-ah 4-2 in hnu fual mah se hun tawp meuh chuan 5-4 in an tho chhuak ta zawk.
Man United hun tawn hi 1999 Champions League final nen a khaikhin theih a, a lawmman erawh European champion ni loin Europa League nomawi leh season thara UCL khelh beisena a la ni chauh thung. Ropuina ram thleng turin Man United-in match thum an la mamawh.
A tlangpui
Man United-in Manuel Ugarte leh Diogo Dalot te goal hmangin first half-ah hma hruai mah se Lyon-in second half-ah Corentin Tolisso leh Nicolas Tagliafico te hmangin an sut zo ve vek. France ramah 2-2 in an inhnehtawk a, Old Trafford-ah 2-2 ni lehin aggregate-ah 4-4 a ni chiah.
Minute 90-na zawh hma hretin Arsenal midfielder hlui Tolisso hnawhchhuah a ni a, player 10-in Lyon an khel tawh. Mahse, extra time-ah Lyon hian Rayan Cherki hmanga hma an hruai hnuah Alexandre Lacazette-a'n minute 109-naah penalty aṭangin goal a khung belh.
Old Trafford a ngui. First half-ah Man United-in inkhel an thunun a, goal hnih an khung bakah Casemiro ball pet chu Lucas Perri-a'n a dang hram a, Bruno Fernandes-a'n crossbar a pet per dawp bawk. Mualneitu hian minute 45 chhungin goal hnih khung mah se extra time-a minute 10 pawh awm tling tawh loah 4-2 in an hnufual a, aggregate-ah 6-4 a ni. Team satliah tan chuan beidawnna tham a tling.
An tho ta
Sir Alex Ferguson hun laiin Man United-in tlawm duh lohna thinlung an nei ṭhin a, kum 10 chuang hnuah pawh a la bo lo e. Referee-in hun tawp ham rik a la ham miau loh avangin Man United an tlawm duh lo a, beiseina a mit lo.
Goal li chhuah mah se first leg-a mawhphurtu Andre Onana mawhpuh ringawt tum loin chak tumin an bei zawk. Casemiro tawnhriat neih ṭhat a lang a, a penalty hlawhchhuah chu minute 114-naah Bruno Fernandes-a'n khung.
Man United-in an nawr chhunzawm a, player 10-a khel Lyon an buai bawk. Minute 120-ah Kobbie Mainoo-a'n box chhunga rilru fim puin si phurh a sut zo a, 4-4 ni chiahin aggregate-ah 6-6 a ni ta bawk. Injury time-ah penalty hlawhchhuaktu leh Mainoo goal khungtu tur siamtu ball vawrhluh chu Harry Maguire-a'n a tauh lut.
Old Trafford-ah hlimna leh lawmna a kir a, chhamdamna thlentu chu an nuihsawh leh an diriam hnu Maguire a ni. English defender hi captain armband an chhuhsak bakah a chhuah dan tur dap ngial mah se Old Trafford-a cham a thlang a, a hrehawmna tawrh ngaihtuah thiampui chuan tuna a hun tawn hi an lawmpui thiam lehzual ngei ang.
14-na ni mah se
Premier League history-a club ropui ber Man United hi tun season league-ah 14-na ni daih mah se season ṭha taka khar thei dinhmunah an ding. Ruben Amorim-a hote hian Europa League semifinal-ah Spanish club Athletic Bilbao an hmachhawn dawn a, an beisei ngam loh an beisei leh thei ta.
Europa League nomawiin Champions League khelh a chhawm a, nomawi hi an chawi thei ngat a nih chuan Amorim-a naute hian league-a an chunga awm zawng zawng deuh tho hi an awt bik lo ang. Mahse, nomawi hi hnai tak siin a la hla tih hriat a ṭha. Nomawi chawi tuma an inpuahchah nan April 20, Pathianni zan dar 6:30 hian Premier League-ah Wolverhampton Wanderers an hmachhawn leh phawt ang.