Van Dijk-a'n contract thar a ziak

Liverpool captain Virgil van Dijk-a'n Anfield-a cham a duh thu a sawi ṭhin chu a tak ram a chantir a, Dutch defender hian Reds-ah contract thar a ziak - season hnih dang chu Merseyside club tan hian a khel leh dawn.

Kum 33 mi centre back hi a contract neih lai ang chuan, season tawp ruala contract hmang zo tur a ni a, mahse, Mohamed Salah hnung zuiin, Liverpool tana khelh chhunzawm zel a thlang ta zawk.

Van Dijk chuan, "Ka duhthlanna hmasa ber chu Liverpool a ni reng hin. Thil dang ka ngaihtuah lo a, ka rilruah chuan Liverpool-a khelh chhunzawm zel hi thil chiangsa a ni," a ti a, hmun dang a hawi loh thu a sawi.

Netherlands captain ni bawk hian January 2018 khan Southampton aṭangin Liverpool hi pound maktaduai 75-in a zawm a, a hunlaia defender man to ber ni mah se, Liverpool hi VVD mana heti zat an insengso hi an inchhir lo khawp ang.

Liverpool tan inelna hrang hrangah match 314 ngawt khel tawhin, goal 27 a khungsak a, assist vawi 13 a nei bawk. Nomawi langsar zingah Premier League, Champions League, FA Cup, Club World Cup leh EFL Cup (2) te a chawipui bawk.

Kum 2023-a Jordan Henderson-a'n Liverpool a chhuahsan hnua captain atana ruat VVD chuan, "Kei leh ka chhungte tan Liverpool-a awm zel hi duhthusam a ni a, kei chu Liverpool mi leh sa ka ni. He khawpuia chengte pawhin, 'Kan mi leh sa a ni' tia min koh ka hria a, ka lawm takzet.

"Ka thinlung chhungril takin ka lawm a, ka phur hle. Ka career pumpui ka thlir hian ka thlen chinah ka lawm em em a, he club-ah kum hnih dang ka khel chhunzawm thei tur pawhin min tihlim hle a ni," a ti a, Reds-a contract thar a ziak thei chu a lawm thu a sawi.

VVD hi Paris St-Germain leh Chelsea te pawhin a contract a zo dawn tih an hriatin an thlithlai a, mahse, amah ber hian Anfield-ah cham a duh - kar khatah £400,000 a hlawh dawn a, Salah nen an hlawh zat a inang dawn.

Dutch defender hi football khawvela defender hlawh hnem ber a ni nghal a, Reds tan ani ang player an chelh thei hi chanchin lawmawm a tling. Arne Slot-a hnuaiah EPL minute zawng zawng a khel kim vek!

Reds hian Pathianni zan dar 9:00-ah league match khel turin Leicester City an lenchilh dawn a, an inkhelh hmaa Arsenal-in Ispwich Town an ngam loh a, Liverpool an chak zui chuan Slot-a naute hi Premier League champion an ni tawh ang.