Goal nga khungtu Newcastle

Newcastle United chuan season tharah Champions League khelh an tum tih an pholang a, manager Eddie Howe-a'n damlohna avangin ho thei lo mah se, Crystal Palace chu 5-0 ngawtin an sawp.

Magpies tan Jacob Murphy, Marc Guéhi (own goal), Harvey Barnes, Fabian Schär leh Alexander Isak te chuan goal khat ṭheuh an khung a, Palace-in a chhanletna tur an neih loh avangin Newcastle an chak chiang.

Newcastle United hi table-ah pathumnaah an invawrh chho ta a, season thara Champions League khel turin an dinhmun a ṭha rih hle - hetihrual hian pasarihna Aston Villa thlengin Premier League khelh an la beisei!

Premier League club zingah Liverpool chu UCL khel turin an tling chiang tawh a, Arsenal pawh tling chianga ngaih an ni - season tharah EPL club pangain Champions League an khel thei dawn a, club pathum hi a la chiang lo.

Magpies bakah Nottingham Forest, Manchester City, Chelsea leh Villa ten hmun ruak pathum an la inchuh a, pasarihna Villa-in pathumna Newcastle an thlauhna hi point nga chauh a ni - zanin dar 10:00-ah club pahnih hi an intawng dawn.

Villa hi Champions League aṭanga tla hlim an ni a, Europe huap pawha club ṭha Paris St-Germain laka an khelh dan enin, Magpies laka chak beisei ngam tur an ni. Unai Emery naute hian hnehna an chan chuan point hnih chauhin Magpies an thlau dawn a, UCL beiseina a sang lehzual ang.

Hetihlai hian Newcastle hi manager Howe a la dam loh avangin a assistant pahnih Jason Tindall leh Graeme Jones ten an ho leh dawn a, khualmuala Villa hneh chhunzawm hi thil hautak a ni dawn.

UCL khelh beisei zingah Manchester City chu zanin dar 7:30 hian an inlan dawn a, Pep Guardiola naute hian khualmualah Everton an lenchilh ang.