Chak lo mah se Chelsea an tlang

Chelsea chu an an mikhual Legia Warsaw lakah 2-1 in an chak lo a, mahse, an intawn hmasakah si thum faia an chak avangin belhkhawmah Blues hi 4-2 in an chak a, Conference League semifinal an lut.

Stamford Bridge-ah mikhual tan Tomas Pekhart chuan penalty a chhuih luh bakah Steve Kapuadi chuan a khung a, mualneitu lam goal neih chhun hi Marc Cucurella khung a ni thung a, player ṭha inlan chunga chet fuh loh hi English club tan chanchin ṭha a ni lo.

Chelsea captain Reece James chuan, "Kan khel ṭha lo takzet a, a tir aṭanga a tawp thleng khan beisei kan phak lo. Si thum faia hma kan hruai tawh avangin kan inthlahdah niin a lang, theihtawp chhuaha kan khel lo a nih chuan khingpui kan zah lo tihna a ni thei bawk.

"Insiamṭhat nghal kan ngai, inbuatsaihna ṭha tawk lo rah chhuah kan hmu," tiin an khelh danah a lawm lo hle. Blues hian season an hmang ṭha tawk lo a, an tan chuan Conference League hi nomawi chawi theih chhun a ni ang.