Silly Point: Good Saturday

IPL 18-na league stage kawng chanve chu kan lo zawh chho ta reng mai a. History nei ṭha leh nomawi chawi ngun ber team Kolkata Knight Riders, Mumbai Indians leh Chennai Super Kings te table chanve hnuai lama an awm mek laiin, table sang panga zingah Gujarat Titans chiah champoin tawh an awm. Titans hian kum 2022 khan IPL nomawi hi an chawi a ni.

Stadium ruak

Inkhel a tam a, kar laklawh (working day) zan inkhel ṭhenkhat erawh stadium a ruak deuh tlat ṭhin hi IPL organiser leh BCCI lam tan pawn inenfiah deuh a ngai tih a chiang. Ticket chungchangah erawh BCCI-in thu a nei vak lo a, franchise tinte thuneihna hnuai a ni.

Kumin hian a let thumten ticket man tihsan a nih avangin, fans lungawi lohna au thawm a tam a. A bikin Kolkata mipuite, Eden Gardens an han dak ruah huai mai kha a inhmeh lo tlawt a ni.

Class

Virat Kohli a class lo sanzia kan hmu zel a. Wine tha mi ang mai in, a upa telh telh a, a tuihnai telh telh mai a nih hi maw. Yuzvendra Chahal an batting pitch dik tak, spin vawm dan demonstration diktak khawvel hmuhah a rawn pholang a. A tuartu chu KKR te an ni.

Game danglam chak, ngai reng si

KKR leh Punjab Kings intum ṭum khan run tlemte chauh siamna inkhel pawh hi a lo hmuhnawm theihzia cricket fan-ten kan hre thar leh a. Strategy, tactic chi hrang hrang a rawn pianchhuah nitin zantin lai hian, uluk taka han chhui chuan chuan 4 leh 6 vuak tam tluk chu a awm lo nangin, team dingchang zawk hi chu dot ball nei tlem zawk zawk te, fielding laia runs hnih khat tal lo 'save' hram hram theite hi an ni tlangpui lawi si. IPL inning khatah hian chawhrualin dot ball 28 vel awm ang a ni.

Weekend nghahlelawm

Vawiin tlai dar 3:30 hian Gujarat Titans leh Delhi Capitals intum tur hi top of the table dinhmun sawhnghehna a ni dawn a. A chak zawk zawk chuan playoffs an ke pakhatin an rap kan ti thei ang. Zanin dar 7:30 hian Rajasthan Royals leh Lucknow Super Giants te an inkhel bawk ang.

Pathianni tlai dar 3:30-ah Punjab Kings leh Royal Challegers Bengaluru te an inkhel ang. Zan dar 7:30-ah Mumbai Indians leh Chennai Super Kings intumtur erawh, a chak loh zawk zawk IPL bye bye kan ti thei bawk ang. A hmuhnawm zel e.