PVL handbook an tlangzarh

Pro Volleyball League khelh hun a hnai a, inbuatsaihna a kal chho zel - Ningani khan PVL Handbook chu tlangzarh a ni a, inkaihhruaina dan hi Youth Icon 2024 Lalsangliana Pautu (Taitea) chuan a tlangzarh a ni.

Hawla Indoor Stadiun, Republic Vengthlanga tlangzarhna hunah hian MVA president Dr. Lalmalsawma Nghaka chuan, "MVA hruaitu lo ni tawh te'n theihtawp an lo chhuahna rah hi tuna MVA hruaitu ni mek leh district, club, player leh volleyball tuimi te'n kan chang hi lawmawm ka ti hle.

"Covid hripui lên lai tih loh kha chuan sports discipline ṭhangduang ber kan ni ta hi a lawmawm hlein ka hria. Hei aia nasa zawka hmasawn zel hi Mizoram puma kan tum a nih piah lamah Mizoram chauh ni loin international coach leh international player neih belh zel hi kan tum a ni a, Pathianin rem a tih chuan tuna kan neih mek National Referee bakah International Referee pawh kan la nei ve zel thei ang," a ti.

Tualchhung volleyball inelna lian ber PVL hi April 29 aṭangin LPS Arena, Falkland Vengah khelh ṭan a ni ang a, MVA Cup champion Thutak Nunpuitu Team, MVA Invitation Cup champion Tuichangral, Khawbel leh Sihphir bakah playoff atanga tling Anastasia leh Hunthar te an inlan dawn a ni.

Hmeichhe lamah inelna hnuhnung berah khan pro division-ah team panga an awm a, tun season-ah pathum inziak lutin kum zawna Pro Volleyball champion ni lai Luangmual leh team hlun Bungkawn bakah Kolasib Diakkawnin champion nih an inchuh thung ang.