Kar 10 chhung atan Trippier an hrem

Atletico Madrid right-back Kieran Trippier chu sum inthapna dan a bawhchhiat avangin English football-a thuneitu sang ber Football Association chuan kar 10 chhung atan a hrem a, he hremna hi FIFA chuan pawmpuiin kar 10 chhung chu football kaihhnawih thilah a inhnamhnawih thei dawn lo a ni. 

July 2019 khan English defender hian Tottenham Hotspur aṭangin Atletico chu pound maktaduai 20-in a zawm a, a dan bawhchhiat hi hetih hunlai bawr vela thleng niin khawthlang media-te chuan an tarlang. 

Kum 30 mi Trippier hi thubuai pasarih siamsak a ni a, a thubuai neihte hi a pha vek - mahse, FA chuan chhui chianna a neih hnuah a thubuai paliah a thiam lo tih an hmu chhuak a, kar 10 atan an hrem ta a ni. 

Trippier hian hrem a nih chhung hian Atletico tan match 12 zet chu a khel dawn lo tihna a ni a, heng zingah hian Champions League last 16 match khel tura February 23 zana Chelsea an mikhual tur chu a tel. 

Thawhlehni zan khan Atletico hian La Liga-a an hmahruaina sawhnghet turin Real Sociedad chu 2-0 in an hneh a, he inkhelah hian Mario Hermoso leh Marcos Llorente-te chuan second half-ah goal khat ve ve an khung - he inkhelah hian Trippier chu a la inlan a, December 30 zan dar 11:45-a Getafe an mikhual hun aṭangin a inlan thei lo ṭan ang.