Real Madrid-in Granada an hneh
Zinedine Zidane enkawl Real Madrid chuan champion an la tum ve reng tih pholangin Granada chu Nilaini zing khan 2-0 in an hneh a, hmahruaitu Atletico Madrid nen match hniha khel tam zawk chungin an point hmuh zat a inang zel.
Real tan hian Casemiro chuan minute 57-naah goal hmahruai a khung a, tun hnaia form tak Karim Benzema chuan first half hun pek belhah goal dang rawn khung ve lehin chak a nemnghet.
Granada hian Real Madrid khelmualah hmahruaina hun ṭha tak an nei a, mahse Antonio Puertas chuan a hun ṭha neih chu holam takin a khawhral a ni - Raphael Varane-a'n ball a hloh hnuah Roberto Soldado chuan Puertas tan hian a siamsak a, mahse, kum 28 mi Puertas hian vengtu nei loa a ding chungin goal chung lamah a hun ṭha neih hi a thlawh over.
Zidane-a'n chak result karah thu hriat nuam lo a nei tel a, Brazilian winger Rodrygo chu minute 38-naah a malpui hliam vangin zawnchhuah a ngai - he thu buatsaih thleng hian a hliam dinhmun chiang taka sawi theih a la ni lo.
Inkhel Results
Getafe 1 - 1 Celta Vigo
GET: Damian Suárez 7'
CEV: Iago Aspas 17' (P)
Real Madrid 2 - 0 Granada
REM: Casemiro 57'; Karim Benzema 90+3'
Deportivo Alavés 2 - 1 Eibar
DEA: Edgar Méndez 41'; Deyverson 45+2'
EIB: Pedro León 4'
Real Betis 1 - 0 Cádiz
REB: Guido Rodríguez 71'
*December 29-ah La Liga inkhel a awm leh chauh ang.