A tawpah Man City an chak

Manchester City chuan hun tawp dawnah goal hnih khungin Everton chu 2-0 in an hneh a, season thara Champions League khel thei ngei turin an dinhmun an sawhnghet chho zel, pathumna dinhmun an luah lailawk.

Inrinni zan inkhel dangah Aston Villa chuan an chunga awm Newcastle United chu 4-1 in an hneh ve bawk. Unai Emery naute hian khelh zat inangah Magpies an phak lohna chu point hnih chauh a ni ta, pangana chin ni tura inum boruak a sang chho zel dawn.

A tawpah City

Goodison Park-a inkhelah Man City lamin ball chang tam in nawr viau mah se goal an khung thei mai lo, goalkeeper Jordan Pickford a che ṭha tlat. Everton tan James Tarkowski chuan corner aṭanga ball kal a tauhlut teuh hle, goal ban a per hlauh.

Kevin de Bruyne leh a ṭhianten goal an nawr na chhunzawm a, a tawpah a rah an seng. Hun tawp dawnah Matheus Nunes-a cross chu awm hmun thlang diktu Nico O'Reilly chuan a khung, an la duhtawk zui mai lo.

Hamrik hnuhnung rik hma hret in box chhungah Ilkay Gundogan chuan ball a ti per a, ball per dawngtu Mateo Kovavic tan lai deuh tak tur angin lang mah se tlu pahin mawt zetin a let lut a, an chak a nemnghet zui ta a ni.

Man City manager Pep Guardiola chuan, "England ram aṭanga Champions League khelh phak chu a ṭha, a nihna takah chuan Premier League aṭanga UCL khelh hi tun season atan chuan kan tan a ṭha tawk, chu aia sang beisei chu a rem rih lo," a ti.

Villa chak chiang

Champions League aṭanga an tlak hnuah Aston Villa an insiamṭha nghal. Unai Emery naute hian an mikhual Newcastle United chu 4-1 in an hneh - Ollie Watkins, Ian Maatsen leh Amadou Onana ten goal khat ṭheuh an khung bakah Magpies defender Dan Burn chuan anmahni lamah a ti lut bawk.

League Cup champion Newcastle United tana Fabian Schar-a goal khungin awmzia a nei lo. Eddie Howe-a naute hian league match 33 aṭangin point 59 an hmu a, pathumna ni mek mah se parukna Villa nen an inkarah point hnih chiah a awm.

Aston Villa manager Emery chuan, "Match tin mai hian hmasawnna ka hmu ṭhin a, chu chuan min ti lawm ṭhin. Kan hmabak hlenchhuah tur a la tam a, midang ngaihtuah loin keimahni chauh kan inngaihtuah ang," tiin a sawi.

UCL-ah 5

Premier League aṭangin club pangain UCL an khel dawn a, Liverpool an chiang tawh a, Arsenal pawhin an khel mai a rinawm. Hmunruak pathum hi team panga Newcastle United, Manchester City, Nottingham Forest, Aston Villa leh Chelsea ten an inchuh.

Zanin dar 12:30 hian Nottingham Forest-in Tottenham Hotspur an tlawh dawn a, Nuno Espirito Santo hote hi an chak lo a nih chuan UCL khel turin an dinhmun a chiang tawh dawn bik lo. Season tawp lamah club lian danglamna a lang chho a, Chelsea-in nizan lama Fulham an hneh theih phei chuan UCL khelh tum inchuh boruak hi a sang lehzual ang.