Mualpuiah Saron par a vul

Sharda University Mizoram Super League X-ah Saron Veng BC-in MSL khelh chhunzawm zel an duh tih an pholang a, relegation playoff final game 1-ah Champhai BC chu 107-73 in an hneh.

R. Dengṭhuama Indoor Stadium, Mualpuia inkhelah a ṭantir aṭanga a tawp thlengin Saron BC an chungnung nghal a, quarter tawp berah Champhai insiamṭha hret mah se, Saron Veng an ngam ngang lo.

Saron Veng thawhhona a ṭha a, anni aia tawnhriat nei ṭha zawk Champhai BC lakah an buai lo - Biakmuanpuia (24 points), Frederick Elombi (23), Abhisek Tyagi (23) leh Lalhmachhuana (22) te chakpui tham khawpa ṭhain an che vek a, Champhai an che hleithei lo.

Champhai tan Dee Franklin che ṭha mah se, puitu a nei ṭha lo a, team game a nih miau avangin player pakhat chet fuh a tawk lo - Dee Franklin hian point 37 ngawt a team tan a score a, mahse, Champhai player dang zingah point 15 score tling thei an awm lo!

Aizawl khaw pawn club awmchhun Champhai tan player chhuanvawr Lalropuia'n beisei a phak lo a, point 12 aia tam a team tan a thawk chhuak thei lo a, Samuel Lalramdintluanga pawhin a 'NIL' zan a tawng.

A tawpah khel ṭha zawk Saron BC an chak a, MSL inhamtang turin vawi khat chak chiah an mamawh ta! MSL relegation playoff final hi best of three series-a khelh niin, Thawhlehni zanah game 2-na an khel leh ang - Saron an chak chuan MSL an inhamtang ang a, Champhai an chak chuan match thumna hmangin MSL-a cham tur zawk chinfel a ni ang.