India squad-ah Cindy an ko

Indian football hmeichhe team coach Crispin Chettri chuan AFC Women’s Asian Cup 2026 Qualifier atana India probable squad a puang a, player koh chhin 39 zingah Mizo midfielder Cindy Remruatpuii Colney a tel.

Blue Tigresses-te hian June 23 - July 5 inkar hian Asian Cup qualifier an khel dawn a, Chiang Mai, Thailand-ah inelna hi hmachhawnin, group B-ah Thailand, Mongolia, Timor Leste leh Iraq te nen an awm ho.

Group tin aṭang hian table chung ber luahtu chauh chu Asian Cup 2026 khel turin an tling dawn a, India tan hmabak a awlsam dawn lo hle - May 1, Ningani aṭangin Padukone-Dravid Centre for Sports Excellence, Bengaluru-ah an camp ang a, heta ṭang hian final squad tur puan a ni leh ang.

Armed Veng tleirawl Cindy hian Indian Women's League-ah East Bengal tan khelin, season hman zawh takah champion nomawi a chawipui - India tan hian age level-ah a lo inlan tawh ṭhin.

Mizo coach lar Lalbiaksanga Colney fanu Cindy chuan, "Final squad-a tel tur chuan a la harsain ka ring a, chutihrual chuan tawnhriat atan ringawt pawh a ṭangkai a, koh zinga ka tel hi ka lawm khawp mai," tiin Vanglaini a hrilh.

Cindy chuan IWL thlirkirin, "Kan squad a ṭha a, kan champion hi chu ka inring sa ve deuh. Kil tinah India international player deuh ṭhuau leh foreign player ṭha kan kawl a, champion pawh kan phu a ni," a ti.

Season hmasaa East Bengal tana lo khel tawh Cindy-in tawnhriat a la nei tam tawk lo a, first XI chan reng a harsa - hetihrual hian bench aṭang erawhin a lut reng a, Kolkata club champion theih nana player thawhhlawk a ni.

Cindy chuan, "Bul ṭan tam tawk lo mah ila, ka tan chuan East Bengal-a khelh hi tawnhriat ropui tak a ni a, player senior zawkte aṭangin ka inzir nasa a, anni pawhin min pui nasa hle," tiin Vanglaini a hrilh.

Mizo midfielder Cindy hian East Bengal-ah a contract a hmang zo tawh dawn a, Indian club ṭhaten Mizo tleirawl hi an rim rawn mek - a khelhna tur hmun a la tichiang lo.