Half Marathon atan inziahluh theih

Aizawl International Half Marathon (AIHM) chu Mizoram sorkar, Innovation India leh Athletic Federation of India ṭangkawpin April 26, Inrinni hian RG Stadium, Aizawlah an buatsaih dawn. Half marathon hi RG Stadium, Mualpui aṭangin tlan chhuah ṭan a ni ang a, RG Stadium-ah bawk tlan luh leh tur a ni ang.

Kumin hi a bul ṭanna tur a ni a, kum tina neih chhoh tum a ni. Tun ṭum inelnaah hian state pawn bakah foreigner te pawh an rawn tel dawn a, lawmman an sum sem ral tur hi nuai 10 a ni.

A inziahluh theih

Registration hi online leh offline-in a inziahluh reng theih tawh. Marathon inelna lian thamah a thlawn tawpin an tlan ngai lo a, registration fee a awm ṭhin. Tun ṭuma tlan tur Aizawl International Half Marathon-ah pawh hian registration fee a awm a, India rama cheng tan Rs 799 niin foreigner tan US Dollar 30 (Rs 2581.12) a ni thung.

Mizoram chhunga international half marathon hmasa ber tur a nih avangin Mizo mipui tan mellung pawimawh a ni a, hetiang hun bika tel hi kum khaw sawi a tlin avangin ngaih hlut thiam a ṭul hle.

Online-a inziaklut duh tan www.aihm2025.com-ah a inziahluh theih a, offline a inziaklut tur tan Millenium Centre kawtah a inziahluh reng theih bawk.

A thui zawng

Half marathon hi 21.1 km a ni a, hei hi inelna pui ber tur a ni. Mi nawlpui tana tlan theih tur 'open race' siam a ni a, 10 km a ni dawn. Nuam tia tlan duh tan pawh 'fun race' 5 km tlan tur a awm a, kum naupang zawkte inelna tur junior race 5 km a awm bawk dawn.

Category pathum half marathon, open race leh fun race-ah hian inelna hi mipa leh hmeichhiain lawmman siam vek a ni a, a ti ṭha panga tan lawmman a awm dawn. Junior race-ah erawh mipa leh hmeichhia an inel kawp ang.