I League champion atan Churchill an puang

I League zawh aṭanga kar hnih dawn a liam hnuah Churchill Brothers chu champion-ah an puang. Goan club hian point 40 an hmu a, champion turin AIFF hnuaia Appeals Committee thutlukna an nghak.

Ruahman dan chuan I League champion chungchang hi April 28-a rel tur a ni a, mah se thulukna hi April 19, Inrinni khan an ti chhuak ta zawk.

AIFF-in thutlukna a siam lawk loh avangin Churchill hi an lungawi lo a, AIFF Super Cup an khel duh lo. Club neitu Churchill Alemao chuan, "A hmasa berah chuan Pathian chungah lawmthu ka sawi a, Goan mipui te chungah ka lawm em em bawk. Pathian khawngaihna leh mipui puihna vang liau liauin kan champion a ni," tiin a sawi.

Churchill Brothers-ah hian Mizo tlangval pathum Lalliansanga (Lunglei), Lalremruata (Khawruhlian) leh Lalbiakhlua (Khawbel) te an khel a ni.

Pahnihna dinhmun luahtu Inter Kashi erawhin thutlukna an pawm lo a, infiamna khawvela thuneitu sang ber Court of Arbitration in Sport (CAS) hnenah an zualko dawn.