Champion tum Barca an chak hram

Barcelona chuan hun pek belh minute riatnaah goal an khung a, an mikhual Celta Vigo lakah 4-3 in an chak hram - champion tum Barca tan vawi khat chetsual pawh a pawi thui a, Celta lakah point an hloh dawn niin a lang hman.

Mahse, hun pek belh minute riatnaah penalty an hlawh chhuak a, Raphinha chuan hei hi goal-ah chantirin, mikhual Celta Vigo tan chhanletna hun a awm tawh lo - Barca an chak a, La Liga table chung ber an luah chhunzawm zel.

Barca khelmualah Celta striker Borja Iglesias chuan a thiam thil 'show' in, hattrick a siam a, 3-1 in Celta hi hma a hruaipui hman hial. Mahse, Ferran Torres-a'n goal hmahruai a khung bakah, Dani Olmo leh Raphinha ten si phurh an sut a, hun pek belhah Raphinha vekin chakna goal a khung zui.

Catalan club hian pahnihna Real Madrid chu point sarihin an tlansan zui a, nizan khan Real hi inlanin, an result kan hre hman lo - hetihlai hian Atletico Madrid chuan 1-0 in Las Palmas an hneh lo a, champion beiseina a tlem ta.

A tirin Celta

Barcelona-in an mikhual Celta Vigo lakah goal an khung hma a, Hansi Flick-a hnuaia season duhawm tak hmangtu Ferran Torres chuan minute 12-naah goal hmahruai a khung der - tun season-a goal 17 a khungna chiah niin, a professional career-a season khata club tana a khung hnem ber a ni.

Mahse, Barca hlim chhung a rei lo. Celta-in champion tum team lakah an duai bik lo tih pholangin, minute thum hnu lawkah Iglesias hmangin si phurh an sut a, goal dang lut loin chawlhlawk an hmang zui.

Celta an phur laklawh - second half-ah pawh Iglesias bawkin a khung belh leh a, goal hnih a rawn khung! Minute 65 pawh an khelh tlin hmain Spanish striker hian hattrick a siam fel der a, mahni mualah Barca an hawihai.

Mahse, Catalan club ṭantute mangan chhung erawh a rei lo. An goal thumna an chhuah aṭanga minute hnih hnu lawkah Olmo chuan si phurh sut ṭhenna goal a khung a, minute li hnuah Raphinha chuan a khung ve leh bawk.

A tawp kharna

Barca khelmualah rin aia hmain thawnthu a inher danglam a, 3-1 a an hnufual aṭanga minute ruk chhungin Barca-in si phurh an sut fel. Hetihrual hian goal dang a lut lawk lo a, 3-3 in an ṭin mai dawn niin a lang.

Mahse, hun pek belhah Catalan club vanneihna a her chhuak. Barca talbuai lai taka si phurh sut ṭhenna goal khungtu Olmo bawk a lang a, penalty a hlawh chhuak - video assistant referee (VAR) inrawlh hnuah referee-in penalty spot a kawk.

A pet turin Raphinha a lo pen chhuak a, goal-ah a chantir. Barcelona an vannei tih loh rual a ni lo a, point khata lungawi zir hman tawh khan point thum an hlawh chhuak. Raphinha hian tun season-ah Barca tan match 48-ah goal 30 a khung tling ta a, assist vawi 23 a nei bawk.

Barca-in hun pek belha chakna goal an khung laiin, Atletico Madrid erawhin injury time-ah goal an chhuah ve thung a, an mikhualna ramah Las Palmas an ngam lo - Javi Munoz chuan hun pek belh minute thumnaah chakna goal a khung a, Atletico hian match ruk khelh tur la awmah point 10 laia Barca an thlauh avangin champion beiseina a tawp, tiin a sawi ngam.