Indian Super Cup khel ṭan

India rama club football inelna ngaihhlut hlawh, Indian Super League leh I League club ṭhenkhatte inelna, Indian Super Cup chu nizan aṭang khan khelh ṭan a ni a, zaninah pawh match hnih an khel ang.

Nizan khan match hmasa berah Kerala Blasters leh East Bengal an inkhel a, he thu buatsaih a nih lai hian result kan hre hman lo - ISL champion Mohun Bagan leh I League champion Churchill Brothers pawh inkhel tur an ni a, mahse, Churchill an inlan duh loh avangin Bagan hi quarterfinal an tlang zui.

Churchill hi I League champion-ah puan ni tawh mah se, point hmu sang ber chunga champion lo thei dinhmuna an din hman avangin an lungawi lo a, Super Cup aṭangin an inhnukdawk hman tawh.

AIFF-in thutlukna siam zuiin, club dang a la lut tawh hran lo a, Bagan chu round of 16-ah hian 'bye' tirin, quarterfinal an lut nghal a ni.

Super Cup hi ISL club 13 leh I League club pathumte inelna a ni a, mahse, Churchill an tel tak loh avangin I League club pahnih chauh an inlan dawn - knockout tournament a ni a, vawi khat chak lohah inelna an mangṭha nghal zel dawn.

Vawiin tlai dar 4:30 hian FC Goa leh Gokulam Kerala an inkhel dawn - Goa hian Mizoram player Ayush Chhetri an ni a, Gokulam hian Ramdinthara (Tharpuia) an kawl thung.

Zan dar 8:00-ah Odisha leh Punjab FC an inkhel dawn a, Odisha-ah hian Jerry Mawihmingthanga, Jerry Lalrinzuala, K. Lalṭhathanga (Puitea) leh Isak Vanlalruatfela te an awm a, Punjab hian Mizo player kawl an nei lo.

Super Cup hi JioHotstar-ah online-a en theih a ni a, quarterfinal aṭangin Star Sports 3 chuan television-a en theih turin an pe chhuak dawn bawk.