Playoff match hmasaah Lakers chak lo

Los Angeles Lakers chuan awlsam takin NBA playoff an paltlang ngawt dawn lo niin a lang. Nimin zing Game 1 inkhelah Lakers hi Minnesota Timberwolves lakah 117-95 in an chak lo.

Seeded parukna Timberwolves tan Jaden McDaniels chuan point 25 a nei a, ani bakah hian Naz Reid (23 point) leh Anthony Edwards (22) te chuan an thawhhlawk hle a, an chak theih nana player langsar an ni.

Lakers tan LeBron James-a'n bul a ṭan fuh tawk lo, quarter hmasa berah point a nei miah lo - a tawpah point 19 chu nei phak tho mah se chak pui nan a tawk zo lo. NBA season 19 hmang tawhtu James hian a vawi nga nan NBA title a beisei mek.

Luka Doncic chuan Lakers tan post season a match hmasa ber a khel a, Dallas Mavericks player hlui hian point 37 ngawt nei mah se midang aṭangin thlawpna a dawng ṭha tawk lo a, team a chakpui zo lo.

Lakers coach JJ Redick chuan, "Kan khingpui te khan tharum an ngah em em a, inrintawkna sang tak nen an khel bawk. Keini lam kha kan khel chhia a ni hran lo a, kan elpui chet fuh ṭum kan tawng, game 2-ah chuan thil a danglam ang," a ti.

NBA playoff hi best of seven series hmanga chak zawk zawn a ni a, tlang turin a tlem berah vawi li tal an chak a ngai. Nilaini zing dar 7:30-ah game 2 an khel leh ang.