MSL Final - Khatla nge Zarkawt BCA?
Sharda University Mizoram Super League X final game 1 chu zanin dar 8:30 hian khelh a ni dawn - R. Dengṭhuama Indoor Stadium-ah Khatla TBL leh Zarkawt BCA an intawng dawn a, inkhel a hmuhnawm ang.
Khatla TBL hian MSL ṭantir lam kha thununin, MSL1 leh 2-ah an champion a, hemi hnuah erawh Zarkawt BCA an lo lan avangin Khatlain ro an rel ta reng bik lo - Zarkawt BCA hi vawi nga champion tawhin, champion ngun ber an ni.
Zarkawt champion karlakah Khatla hi vawi khat champion ve leh zawkin, vawi thum nomawi an chawi tihna a ni. MSL season kua khelh zawh tawha nomawi pariat chu club pahnih kutah a awm tihna a ni a, Mizoram basketball an thunun hneh dun hle.
'Final duhthusam' tia chhal ngam final-ah club pahnih an intawng leh dawn a, season hmasa khan final-ah vek Zarkawt BCA hian 2-0 in an lo hneh tawh - Khatla hian thawnthu her danglam an duh dawn.
Ṭantu nei ṭha
Khatlain Mizoram basketball-a an veng ropuina neih let an duh a, an inthuam ṭha hle. MSL ṭantirha player-coach ni chunga enkawltu H. Laldinsanga (Mapuia) chu coach atan thlem letin, Mapuia hoin season an hmang ṭha hle.
League round-a match sarih an khelhah Khatla TBL hi an chak vek a, semifinal lut hmasa ber an ni hial. Hetihrual hian semifinal-ah rin loh takin an chesual a, harsa takin an paltlang.
Zemabawk BC chu game 1-ah 100-91 in hneh mah se, game 2-ah 94-89 in an tlawm a, game 3-ah 109-107 in an chak hram! Tun season MSL-a player langsar Emmanuel VL Awmpuia, Vanlalṭhazuala leh Nary James te an pawimawh leh dawn.
Anni pathum an chet ṭhat chuan Zarkawt BCA tan a harsa dawn tih a chiang a, Mapuia'n a ho bawk avangin an inringtawk ang - league round-ah ṭawiawmtu nei ṭha tawk lo mah se, semifinal-ah meuh chuan Khatla Veng mipui Mualpui lamah an tleh thla a, zaninah pawh fans nei ṭha zawk nih tumin R. Dengṭhuama Indoor Stadium an mawi leh ang.
Thawhlehna chu
Champion lai an nih avangin Zarkawt BCA chungah beiseina a sang a, beisei ang erawhin season bul an ṭan ṭha lo - Chanmari BC lakah an tlawm a, Khatla an ngam loh zui avangin an match hmasa pahnihah an tlawm!
Mahse, Zarkawt an infuihthar a, an tho leh chiang hle! League match nga a zawnin an chak zui a, semifinal an lut. Semifinal-ah league round-a an ngam loh tawh Chanmari BC tawngin, 2-0 in an veng ṭhenawm hi court pawn lam aṭanga MSL ngaihven turin an tlawm zui.
Zarkawt thawhleh nan Marquis Cunningham chu player pawimawh a ni a, Lalrina Renthlei, Zonunsanga, H. Lalhmachhuana, R. Lalnunpuia leh Matthew Remtluanga Sailo te ho an kawl bawk avangin boruak sang an ngam ṭhin.
Zaninah pawh BCA hian a ropui zawk nih tumin Khatla TBL an hlau dawn lo - a pawimawh pakhat erawh fans ngah ṭhin Khatla TBL an hmachhawn dawn a, Zarkawt mipuiin an veng club player-te an zam mai loh nan an ṭawiawm ṭhat a ṭul ang.