Saka a ngaihtuahawm loh - Arteta

Arsenal manager Mikel Arteta chuan a forward ṭha Bukayo Saka chu a dinhmun a ngaihtuah awm loh niin a sawi. Pathianni zana Ipswich Town 4-0 a an hneh ṭumin Saka hi hliam vanga thlak a ni.

Gunners hian Leandro Trossard leh Gabriel Martinelli te hmangin goal an khung hma, si hnih faia hma an hruai laiin Ipswich defender Leif Davis chuan hnunglam aṭangin Saka hi a ti tlu a, hnawh chhuah zui a ni.

Player tam zawk an nih hnuah Arsenal tan Trossard chuan an goal thumna khungin, hun tawp dawnah substitute Ethan Nwaneri chuan an goal lina leh a hnuhnung ber ni bawk chu a khung.

England international Saka hi hun rei tak chhung hliam vangin a chawl a, tun hnaiah lo kir lehin match a khel tluan thei leh ṭan chauh a, kerek hliam vanga thlak a ngai chu fans lam an hlauthawng hman hle.

Mahse, Arteta chuan, "A na a ti deuh hlek a, mahse hliam na tak a ni lem lo. Thil thleng kha uluk takin ka ennawn leh a, hnung lam aṭanga tharum hmanga player beih pawp mai hi chu a ṭha lo a ni," a ti.

North London club hian Champions League semifinal khelh hmabak an la nei a, European football inelna sang khel tur hian Saka an mamawh a, league match ṭhenkhatah an hahchawlhtir tawh a nih pawhin a mak lo ang.