UCL khel tur : Man City nge Villa?

Zanin dar 12:30 hian Manchester City-in Etihad Stadium-ah Aston Villa an mikhual dawn. Pep Guardiola hote hi Premier League champion lai an ni a, Unai Emery hote hi Champions League quarterfinal lut thei an nih avangin inkhel hmuhnawm a ni dawn. UCL khel tur zawnna a nih dawn avangin a hmuhnawm belhchhahin a awm ang.

Man City hian kartawpah Nottingham Forest nen FA Cup semifinal an khelh dawn avangin Villa nena an inkhelh tur hi sawn hma a ni a, Pep-a hote hian tun season hmang ṭha lo mah se Everton hneh zo hlim an nih avangin inrintawkna an ngah dawn.

City hian nomawi an hum theih loh avangin season thar atan team an din ṭan a, an player pawimawh Kevin de Bruyne pawh season thar atan contract an zawrh tawh lo. Belgian midfielder KDB chuan, "Thutlukna an siam tawp a, kum tluanin engmah min hrilh lo. Mak chu ka ti ve deuh a, ka pawm mai a ṭul. Dik taka sawi chuan ṭha taka ka khelh theih hi ka la ring a, chutihrualin club thutlukna pawh ka hrethiam," tiin a hun tawp hman dan chu pawm a har a tih thu a sawi.

De Bruyne hi lungawi zan lo mah se khelmualah erawh professional player a nih angin a theihna zawng zawng a chhuah a, kumina an match khelh hmabakah hmun pawimawh a chang dawn. City hian tlarhmaah Erling Haaland hliam vanga an chhawr theih loh avangin thlasik bazara an lakluh Omar Marmoush-a'n hmun pawimawh a chang.

Chutihrualin Everton laka chakpuitu erawh player naupang zawk Nico O'Reilly a ni daih a, Rodri awm loh vanga midfield lai luah lumtu Mateo Kovacic pawhin chak nemnghehna goal a khung. City hian Palace leh Everton hneh zawn mah se kuminah an tla hniam tih phat rual a ni lo a, eng team pawh hmachhawn se chak an harsat. Villa lakah pawh point thum hmu saa dah an rem lo.

Unai Emery hote hi UCL aṭangin tla mah se PSG lakah Europe club lian an elpha tih an lantir a, kartawpah pawh an theihna sanzia a lang. Aston Villa hian League Cup final-a Liverpool hnehtu Newcastle United chu 4-1 in an sawp a, Ollie Watkins-a'n goal hmahruai khungin tlarhmaah a hriam hle.

Villa hian Watkins bakah January-a an lakluh Marco Asensio leh Marcus Rashford te tlarhmaa chhawr turin an nei a, an player neih sa Morgan Rogers, John McGinn leh Youri Tielemans te an rintlak. City hneh tumin Etihad Stadium-ah an lenglut ang.