Curry hoin Warriors an chak

Stephen Curry chuan hun pawimawh laiah player pawimawh bik a nihna a lantir leh ta a, nimin zing NBA playoff inkhelah Golden State Warriors chu Houston Rockets lakah 95-85 in a chakpui.

Toyota Center-a inkhelah Curry hian point 31 a nei a, Rockets mualah a zawna vawi nga an chak theih nan hian rebound vawi ruk a lak bakah a ṭhiante basket neih tur vawi thum a siamsak bawk.

Golden State tan hian point 25 neitu Jimmy Butler a langsar bawk a, best of seven series khelh turah 1-0 in hma an hruai. April 24, Ningani zing dar 7:00-ah game 2 an khel leh dawn a ni.

Warriors coach Steve Kerr chuan, "Steph hi chu a danglam a, ven bik a ni chung pawhin kan chakna hnar a la ni thei zel. Kan mamawh chhanna a la nih chhunzawm theih pawh ka beisei," tiin a sawi.

Eastern Conference playoff lamah Cleveland Cavaliers chuan Miami Heat chu 121-100 in an hneh. Cavs an chak theih nan hian Donovan Mitchell (30 points), Ty Jerome (28) leh Darius Garland (27) te an khel ṭha hle.