Hun pek belhah Real an chak hram

Champions League quarterfinal aṭangin Arsenal-in an pet chhuak a, La Liga lamah pawh Real Madrid an chak zo lo nghal teuh hle - an mikhual Athletic Bilbao lakah hun pek belha an goal khung hmangin an chak hram.

Real tan Federico Valverde chuan hun pek belh minute thumnaah goal ropui bik a khung a, inkhela goal awmchhun niin, Madrid khaw club tan chakna goal a ni nghal bawk.

Carlo Ancelotti naute hi table-ah pahnihna an nih chhunzawm a, mahse, Inrinni zan khan Barcelona an chak avangin an inthlauhna erawh a la ngai reng - match ruk khelh tur la awmah point liin an phak lo mek.

Simon-a channa!

Bilbao-in season thara Champions League khelh an beisei avangin Real khelmualah point hlawhchhuah tumin an khel a, goalkeeper Unai Simon a chet ṭhat tel avangin Real-in goal khung an harsat hle.

Spain international keeper hian Eduardo Camavinga leh Jude Bellingham te khung ngei tur nia lang chu a dansak a, Bilbao tlarhnung an khawng ṭhat bawk avangin Real-in pal darh an harsat.

Vinicius Jr chuan Real tan goal a khungah a inngai a, mahse, video assistant referee (VAR) hmanga rei ngial en a nih hnuah an goal khung hi pawmsak an ni lo - goal khung hma hian Endrick chu a lo offside.

A chhanna Valverde

Real-in goal an khung lo mai dawn niin a lang hman a, fan-te rilru a hah. Mahse, hun pek belh minute thumnaah Valverde a inlar a, half-volley hmangin goal chung kil sirah mawi zetin a thlawh lut.

Unai Simon tan meuh pawh tih theih a awm lo a, Real-in a hunah tak goal an khung. Mikhual Bilbao lakah 1-0 in an chak a, Barcelona an um ve zel.

Real hian May 11 zanah Barcelona hi khualmualah an la lenchilh leh dawn a, an inkarah point li chauh a la awm bawk avangin champion turin beiseina sang tak an la nei - beidawn a la thiang lo.

Mbappe an hua!

Kylian Mbappe chuan hrem vangin Bilbao hi a hmachhawn thei lo. UCL match an khelh hmaa Alaves an hmachhawn ṭumin French striker hian ṭul lo takin red card a hmu a, match khat atan hrem zui a ni.

Pathianni zanah Mbappe a inlan theih loh phah a, Bernabeu-a fans ṭhenkhat chuan 'big screen' ah a hmuna inkhel en Mbappe a lo lan rualin an au el hial.

Kum 26 mi striker hian Real a pan hnuah inelna hrang hrangah match 49 khelin goal 32 a khung a, assist vawi li a nei bawk. Mahse, Arsenal lakah dah ṭhatin a awm a, Real fans tam takin mamawh huna che ṭha lo striker hi an dem ni berin a lang.

Ancelotti hma hun

Carlo Ancelotti hoin Real-in hnehna an chang ve leh ta a, Pathianni zan inkhelh hma kha chuan Italian coach hi season tawp hmaa chhuak tur anga sawi thawm a awm hman hial.

Mahse, inkhelh zawhah Ancelotti chuan, "Fan-ten min thlawp ang tih kha ka ring tlat a, tun season-ah thil engemaw tak chu kan tithei ang tih kan ring tlat a ni," a ti a, season tawp thleng chu a awm dawn niin a lang.

Brazil nena sawizawm mek Ancelotti hian Pathianni zan inkhelh hmain nipuiah a hma hun a tihchian tur thu a sawi a, a contract neih lai ang chuan kum 2026 thleng Real-ah a cham thei.