Inter Milan an chak lo

Serie A champion lai Inter Milan chu Bologna khelmualah 1-0 in an chak lo - Simone Inzaghi naute hian hma chu la hruai tho mah se pahnihna Napoli nen point 71 ve ve an hmu, nomawi inchuh boruak a sang zel dawn.

Pathianni zan khan Stadio Renato Dall'Ara-ah Inter Milan hi an lenglut a, hun tawp hma chiahin substitute Riccardo Orsolini chuan goal awmchhun a khung, mikhual team tan sutna hun a awm tawh lo.

Tun hnaiah Inter Milan hian result an nei ṭha tawk lo, a bik takin khualmuala league match an khelh hnuhnung parukah vawi thum ngawt an tlawm - Seie A match khelh hmabak panga an la nei a, tha thlah a thiang dawn lo a ni.

Inter manager Inzaghi chuan, "Team inkhairual leh nghet tak mai kan hmachhawn a, kan duh ang result chu ni chiah lo mah se Bologna khan hnehna chan an phu. Player ṭhenkhat an inkhel thei lo a, kan duh ang thlapin kan khel lo tih erawh hriat a ngai," a ti.

Italian champion hian season kal laiah nomawi pathum an la beisei mek tho. Serie A hmahruaitu an nih bakah Champions League semifinal an lut tawh a, Coppa Italia semifinal an lut tawh bawk.

Inkhel dangah AC Milan chu an mikhual Atalanta lakah 1-0 in an chak lo. Milan hian point 51 chauh an la hmu a, pakuana an ni mek - Milan tan season thara Champions League khelh phak beiseina a sang tawh lo.