An hrem danah Verstappen a lawm lo

Pathianni zan khan Formula 1 Saudi Arabian Grand Prix tlan a ni a, champion lai Max Verstappen chu second nga atan hrem a ni a, pahnihna dinhmun luahin Oscar Piastri hnungah a thleng.

Jeddah Corniche Circuit-a intlansiakah McLaren driver Piastri hian lap 50 chhu darkar khat leh minute 21 leh second 06.758 chhungin a tlan thleng a, pahnihna Verstappen nen an inthlauhna chu second hnih chauh a ni.

World champion vawi li ni tawh Verstappen hi tlankawng a dai sir lutuk a, midang aiin a tlanna a tawi deuh bik nia ngaih niin second nga atan an hrem a, a tawpa an inthlauhna aiin an hremna hi a tam, a tan chuan a uiawm khawp ang.

Red Bull driver Verstappen chuan, "Ngaihdan leh hmuh dan kan neihte hi kan sawi ve thei. Amaherawhchu thuneitu lamin an ngaihsak ngai lo a, ngaihven pawh kan hlawh ngai lo, chuvangin lo sawi ve chiam pawh ka duh lo," a ti.

Dutch tlangval hian season hmasa angin kuminah bul a ṭan ṭha tawk lo, intlansiak vawi nga an neih tawhah ṭum khat chiah hnehna a la chang - driver championship table lamah pawh pathumna a ni mek, a tan nomawi humhim a awlsam dawn lo niin a lang.

Car intlansiakna sang ber hi April-ah chuan an tlan dawn tawh lo. May 4, Pathianni zanlaiah Miami Grand Prix chu Miami International Autodrome-ah an tlan leh dawn a ni.