Tah-a'n Leverkusen chhuahsan dawn

Germany international Jonathan Tah-a'n season tawpah Bayer Leverkusen a chhuahsan tur thu a tichiang a, nipui bazarah free agent a ni dawn.

Kum 29 mi Tah chuan, "A tir aṭang khan engkim kan sawi chiang. Tunah chuan contract pawtsei lo turin thutlukna ka siam tawh a, helai hmunah hian ka cham dawn lo," tiin Bayer Leverkusen a chhuahsan tur thu a sawi.

Tah hian Hamburger SV-ah bul a ṭan a, Leverkusen hi hming a chherna hmun a ni. Kum 2015 aṭangin Leverkusen tan a khel ṭan a, season 10 chhungin tlarhnungah hmun pawimawh a chang char char.

German defender Tah hian Leverkusen hi Bundesliga, DFB Pokal leh DFL Super Cup-ah a champion pui a, Europa League-ah champion pui lo mah se ṭum thum ngawt team of the season-ah an telh a ni.