Dr TAo Football Mizoramin semifinal an lut

NorthEast state-te tana football hmanga inelna Dr T Ao Football-ah Mizoramin nimin khan Assam 4-0 in an sawp.

Group B-a pathumna Meghalaya-in point khat chauh an hmuh avangin match hnih khelh aṭanga point ruk hmutu Mizoramin semifinal an lut a, hmahruaitu erawh an la ni chiang lo.

Mizoram hi January 25, Inrinni hian Sikkim nen an inkhel dawn a, group hmahruaitu an zawng ang. Vawiin hi group A khelh ni a ni a, Nagaland-in semifinal an lut tawh a, Arunachal Pradesh leh Manipur ten beisei tur an la nei.

Mizoram manager T. Vanlalhluna'n Meghalaya 6-0 a an sawp zawhah, "Meghalaya kha team ṭha an ni a, goal ruk khung mah ila goal hmaah kan vannei tel a ni. He team hian Sikkim leh Assam an hneh thei ang," tiin Vanglaini a hrilh.

Hluna sawi ang ngeiin Meghalaya-in an chhe lo tih an pholang a, Sikkim lakah Atlanson Kharmaw hmangin goal an khung hmasa zawk. Amaherawhchu Sikkim an vannei a, injury time-ah Dawa Sherpa-a'n siphurh sutin 1-1 in inkhel a tawp.

Mizoramin an match hmasa bera goal an khung tam avangin Assam lakah goal khung nual tura beisei an ni a, rinlawk ang chiahin goal pawh an khung hma. Minute 3-na lekah F. Lalrinpuia'n vei lam aṭanga cross a tum chu goal-ah kalin Assam keeper a chesual a, Republic Veng tlangvalin goal hmahruai a khung.

Mizoramin beisei ang goal an khung zui lo a, minute 77-naah Vanlalthanga'n box pawn aṭangin a pet goal - Assam keeper tihsual bawk! Goal thumnaah erawh Mizoram thiamzia pholan a ni a, pass mawi tak hmanga Assam tlarhnung an ṭhiah hnuah C. Lalchungnunga'n minute 80-naah a hmawr a bawk. Injury time-ah Valpuia penalty hlawhchhuah chu MS Dawngliana'n goal-ah a chantir a, Mizoram 4-0 in an chak.