Silly Point : IPL Mania

Gentlemen game tia hriat lar cricket hi ni nga chhung khelh ṭhin a ni a, hemi hnu hian ni khat awh 50 overs-ah pawh tawi niin tunah chuan a zinkawng thui tak ṭhin chu darkar thum lek a ni ta. Bollywood star leh celeb chi tin rengten an bawh Indian Premier League chu over 20 leka khelh a ni a, a hun rei lo mah se cricket khawvel innghahna a ni chho hial.

IPL hlutna hi a zual zel a, cricket khawvel innghahna a la ni hrih zel dawn ni pawhin a lang. He cricket game hi khawvel pum a, tun aia a la lar zawk duh phei chuan T10 te pawh hi official takin a rawn pian hun hi a hla tawh tawp lo ang.

Halftime

IPL 18-na (2025) league stage chanve chu kan lo zo fel ta a. Champion ngun ber team zinga mi Chennai Super Kings leh champion lai Kolkata Knight Riders tan beisei tur a chau rau ṭan ta riau a. Nikum lama team ṭha ber pahniha ngaih theih Rajasthan Royals leh Sunrisers Hyderabad te dawl zawrin an zawr mek bawk.

Kum khat chhung lek hian infiamna khawvelah hian thil hi a va danglam chak tak em!

Bihchianna

CSK innghahna lungpui MS Dhoni a lo tar ve tak tak ta a, an silai hman an upgrade lohna a rei ve ta deuh a, a kah a na tawk tawh lo tih a chiang. An batting strategy hman (powerplay laia fimkhur taka khelh a, runs siam aia wicket humhim) a hmanlai ṭan deuh niin a lang.

Sunrisers Hyderabad te batting line up chim thut reng mai hi nikuma an innghahna lungpui Travis Head leh Abhishek Sharma te form ṭhat tawk loh vang tih a chiang reng mai. Away game-ah an talbuai nasa zual. Chutiang bawkin T20 hi chu batsman te inkhel a nih angin, RR te batting line up insiksawi nasa lutuk leh an batting kulhpui pathum Sanju Samson, Dhruv Jhurel leh Ryan Parag a ten an nikum form an chhawm nung thei tlat lo hi an luhaina tih a chiang.

KKR-ten nikum IPL an ngaih dan tur hi ka hriathiampui. Lei leh van ang vel an ni ta. An spinner pathum innghana Varun Chakaravarthy, Sunil Narine leh Moeen Ali te an hlauhawm tawk lo, an home ground Eden Garden-a head curator ber Sujan Mukherjee-a'n spin pitch a buatsaih duh lo, tih vela inmawhpuh tawnna an thleng mek bawk. An home ground-ah a zawnin ṭum thum an tlawm ta pawh hi thil mak a ni ta lo tawp mai.

Inthlitfimna stage

Nizana Delhi Capitals leh Lucknow Super Giants te inkhel result hre hman lo mah ila, tuna a sang panga awm mekte hi chuan point 10-12 an hmu tawh. Team 10 aṭangin team paliin knockout stage an lut dawn a; RR, Sunrisers Hyderabad leh CSK ten point li chauh la hmu mah se knockout stage khel tur zawnna erawh a ngaihnawm dawn tho tho.

Tun dinhmunah Lucknow Super Giants leh Mumbai Indians te hi a sang pali zingah awm lo mah se knockout stage khel turin besieina sang tak an la nei. Match thum dang an khelh leh chuan knokout stage khel tur chin pawh a chiang deuh uar tawh ang.