MSL: Champhai dinhmun a derthawng

Sharda University Mizoram Super League X aṭangin club pathum relegate tur a ni a, Bungkawn LB Associates leh Electric Veng BC an tla tawh - tla tur pakhat chinfel a la ngai a, MSL 'bye bye' thei dinhmunah Champhai BC an ding mek.

Zanin dar 8:30 hian relegation playoff final game 2 khelh a ni dawn a, Saron Veng BC-in hnehna an chan chuan MSL an khel chhunzawm ang. A tawi zawnga sawi chuan Champhai BC tan chak ngei ngei a ngai tihna a ni a, an chak a nih chuan April 24, Ningani zanah final game 3 khelin MSL-a cham tur an chingfel ang.

Saron Veng tan game 3 khelh kher ngai loa chinfel chu duhthusam a ni dawn a, tun season-a vawi hnih an intawn tawhah vawi khat ve ve an chak - league round-ah Champhai BC hi 78-76 in an chak hram a, relegation playoff final game 2-ah 107-73 in Saron Veng an chak thung.

R. Dengṭhuama Indoor Stadium, Mualpuiah a vawi thum nan club pahnih an intawng dawn a, a hmuhnawm ang. Champhai tan 'thih leh thih' tiha beih a ṭul tawh a, game 1-a Saron an ngam loh dan thlirin an chungah beiseina dah san a harsa.

Champhai hian Dee Franklin an nei a, Alabama tlangval hi hmuhnawm khawpin tal ṭhin mah se, Saron lakah puitu a nei ṭha tawk lo a, zaninah tualchhung player an chet ṭhat ve a ṭul dawn.

Season duhawm tak hmangtu Lalropuia'n player theihna nei sang bik a nihzia Saron lakah a pholan a ṭul a, Harshwardhan Tomar a chet ṭhat bawk chuan Saron tana harsatna thlen turin theihna an nei - a pawi ber erawh Champhai BC hruaitute inpekna ngaihtuahin, ṭawiawmtu fans an nei ṭha tawk lo ṭhin hi a ni a, zaninah Champhai fan-te Mualpui lama tleh thlak a ṭul.

Saron tan vawi khat chak chiah a tawk tawh a, theihna zawng zawng hlan hun a ni - Cameroon pa Frederick Elombi bawk hi innghahna tur a ni leh dawn a, Abhisek Tyagi, Lalhmachhuana leh Lalmalsawma te an la nei bawk.

Relegation playoff final game 1-ah Saron hian team thawhhona ṭha chu an chakpui tiin a sawi theih a, zaninah hian game 1 ang thoa an khel chhuak thei a nih chuan Champhai tan dan an harsa ang.