Forest tan UCL beiseina a nung thar
Nuno Espírito Santo-in amah bantu Tottenham Hotspur lakah Nottingham Forest hmangin phuba a la. Thawhṭanni zan inkhelah Forest-in Elliot Anderson leh Chris Wood te goal hmangin Spurs 2-1 in an hneh a, table-ah pathumnaah invawrhchhoin season thara Champions League khel turin an dinhmun a ṭha leh ta hle.
Forest manger Nuno hian kum 2021 khan Spurs hi a enkawl tawh a, thla li lek hnuah an ban. Portuguese manager hian Saudi club Al-Ittihad a enkawl hnuah kum 2023 December thla khan Premier League club-ah a rawn kir a, Forest chu season tawp niah a inham tan pui hram. Tun season-ah Nuno-a'n bul a ṭan pui a, Champions League khelh beiseina an neih bakah FA Cup semifinal an thleng - kar tawp hian Manchester City nen Wembley Stadium-ah an khel ang.
Bul ṭan ṭhat
Forest-in league match hnuhnung pahnihah Aston Villa leh Everton an hneh lo a, UCL khel tura an dinhmun ṭha tak pawh a derthawng hman. Thawhṭanni zanah erawh Forest-in chak an châk tih an pholang a, minute ngana lekah corner kick aṭanga ball per chhuak chu box pawn aṭangin Elliot Anderson-a'n kawh zetin a pet lut.
Mikhual team an phur zel a, Anderson-a ball thawnluh chu box chhunga awm Chris Wood chuan khawih zeuhin Spurs keeper Guglielmo Vicario-a'n a beng chhuak zo lo. Mahse, VAR hmanga ennawn hnuah Wood a offside avangin pawm a ni lo. Minute 16-naah erawh sawisel boin Wood-a'n a khung a, Anthony Elanga cross chu chiang zetin a taut lut.
Forest-in bul an ṭan ṭhat an hmang ṭangkai a, second half-ah Spurs goal bawh nasa mah se point thum an hlawh chhuak ta tho. Chutihrualin Nuno hoten harsatna an tawk a, Pedro Porro corner pet chu Dejan Kulusevski-an goal-ah tauh mah se Harry Toffolo-a'n goal line aṭangin a pet chhuak.
Spurs goal bawh a na zel a, minute 87-naah Pedro Porro cross chu Richarlison-a'n ṭha zetin a tauh lut a, inkhel tawp lam nung viau mah se Forest keeper Matz Sels-a'n hna hautak a nei tawh lo. Forest 2-1 in an chak.
Nuno a lawm
Nottingham Forest manager Nuno Espirito Santo chuan, "Hmasawnna ṭhahnem tak a awm a, insiamṭhat kan mamawh ang chiahin ka naute an khel ṭha. First half-ah inkhel kan thunun a, goal kan nei bawk. Second half-ah Spurs-in chance an insiam a, keini lam erawh kan him thei hram," tiin a sawi.
Forest manager chuan sawi chhunzawmin, "Kan elpuite kan hmaah an khel emaw kan hnungah emaw khel pawh ni se, kan tana pawimawh ber chu inkhel kan hmachhawn dan a ni. Tun season-ah kan huaisen zia kan lantir tawh a, ball zawng zawng chan tumin kan bei a, kan naute an khel ṭha takzet a ni," a ti.
Spurs erawh an chak zawh loh avangin point 37 hmuin 16-naah an awm. Ange Postecoglou hote hian chak an harsat a, table-ah 16-naah awmin season hmang chhia Manchester United hnuaiah an la awm. Mahse, Spurs hian Europa League semifinal an thleng a, nomawi an la beisei miau avangin Postecoglou chungah zahngaihna an la lantir zel.