Clippers an chak ve leh thung

Kawhi Leonard-a point 39 hmangin Los Angeles Clippers chuan Denver Nuggets 105-102 in an hneh a, NBA playoff khelh laiah team pahnih te 1-1 in an inhnehtawk ta chiah, best of seven series hmanga chak zawk zawn tur a ni ang.

Nimin zing Ball Arena-a inkhelah kum 33 mi Leonard a hmuhnawm, basket neih tuma a shot 19 zinga 15 tehmeuh a hlawhtling a, ani bakah hian James Harden (18), Ivica Zubac (16) leh Norman Powel (13) ten an thawh hlawk bawk.

Nuggets hian over time khelhpui theihna ramchang an nei, mahse second ruk chauh a awm tawh tihah Christian Braun chuan 3-points neih tuma a shot chu a hlah a, rebound latu Nikola Jokic chuan a hlah ve leh bawk a ni.

James Harden chuan, "Kawhi Leonard khelh dan kha a mak khawp mai, chesual ve thei lo ang mai a ni. A thiol tih zawng zawng deuh thaw kha a dik tlat, khatiang a ṭha a khelh kha chu thil vang tak a ni," tiin a sawi.

Team pahnih ten vawi khat ve ve hnehna an chang a, an intluktawk mek. April 25, Zirtawpni zing dar 7:30 hian Intuit Dome-ah game 3 an khel leh ang, tlang tur chuan a tlem berah vawi li tal an chak a ngai.

Detroit Pistons pawhin chak ni hmel an hmu ve leh ta - NBA playoff bikah a zawna match 15 chhung chak an neih loh hnuah, nimin zing khan New York Knicks chu 100-94 in an hneh a; Eastern Conference first-round playoff-ah an che fuh hmasa.

Pistons an chak theih nan hian point 33 neitu Cade Cunningham chuan a thawh hlawk hle, ani bakah hian Dennis Schroder chuan point 20 a nei bawk. Kum 2008 Eastern Conference finals-ah Boston Celtics an lo hneh tawh a, chumni hnuah tun ṭum hi playoff china an chak lehna hmasa ber a ni hial.

Pistons coach JB Bickerstaff chuan, "Hetiang hi kan ti thei a ni tih ka hria, theihna sang tak kan nei. Inrintawkna leh beiseina nena kan inkhel a nih chuan tun aia result ṭha zawk pawh kan nei thei ang," tiin a sawi.

April 25, Zirtawpni zing dar 4:30 hian game 2 an khel chhunzawm leh nghal ang.