Pahnihnaah Zverev a awm

Alexander Zverev chuan Carlos Alcaraz nek chhuakin world number 2 a ni leh ta - German tlangval hian kar hmasa khan Munich Open nomawi a chawi a, ranking lamah a dinhmun a siamṭha nghal bawk.

Hrem vangin Jannik Sinner a inkhel thei lo mek a, Italian tlangval awm loh hlain Zverev leh Alcaraz ten world number 1 hnaihchilh theihna remchang nei ṭhin mah se an chhawr ṭangkai tawk lo.

Mipa tennis thuneitu sang Association of Tennis Professionals (ATP) hian world ranking an siam ṭhin a, ranking hi tournament buatsaihtu lamin player an rem dawnin an hmang ṭhin bawk, hei vang hian seeded sang ni turin ranking neih ṭhat a pawimawh.

Clay court season an hmang mek - May 25 aṭanga June 8 chhung hian Paris khawpuiah French Open an khel dawn, chumi hma chuan player-ten inbuatsaihna tournament tenau dang an la khel leh ang.