Sabalenka hnehin Ostapenko champion

Jelena Ostapenko chuan Aryna Sabalenka hnehin Stuttgart Open champion a ni a, tennis season kal laia nomawi a chawi hmasak ber a nih avangin atan chuan a hlu zual ngei ang.

Thawhṭan zan final-ah Ostapenko hi rankai lo zawk a ni, an intawn hnuhnungah pawh Sabalenka a chak. Mahse, seeded pawh ni phak lo hian world number 1 hi 6-4, 6-1 in a hneh.

Latvian nula Ostapenko hian kum 2021 leh 2023 khan Stuttgart Open final hi a lo khel tawh, mahse a chak lo zawkah a ṭang. Tun ṭumah erawh a tan hun ṭha a inherchhuak ve ta a ni.

Kum 27 mi Ostapenko chuan, "Stuttgart Open kan khelh hma khan champion theih hi ka inring, nomawi chawi theih inbeisei lo ni ila chuan tournament khelhin awmzia a nei lo ang," tiin a sawi.

Nomawi a chawina kalkawngah hian world number 2 Iga Swiatek pawh a hneh a, ani bakah hian seeded pasarihna Emma Navarro pawh a hneh tel, atan chuan tournament ṭha leh hriatreng tawh tur a ni ang.