Parma hmachhawn an harsa dawn - Tudor

Juventus coach Igor Tudor chuan Serie A match an khelh hmabak zawng zawngah chak an ngai tih a sawi a, zanina Parma an lenchilh hunah match hautak khel tura an inpeih thu a sawi bawk.

Old Lady hian beisei anga season an hman ṭhat loh avangin Thiago Motta an ban a, a hmun ruakah Tudor hi an la lut - tun thleng chuan Croatian manager hian zawimuangin team a rem ṭha mek a ni.

Serie A pangna ni lai Juventus coach Tudor chuan, "Hahchawlhna hun ṭha kan nei a, inbuatsaihna kan nei ṭha bawk. Parma hi an dinhmun a him tawk lo tih ka hria, chuvangin anmahni khelmualah chuan point hmuh ngei an tum dawn.

"Italian football inelna huangah chuan anni hi dah hniam theih an ni lo a, team lian dangte barakhaih theitu an ni, chuvangin keini pawhin match hautak kan khel dawn a ni tih kan hria," tiin a sawi.

Tudor-a'n a enkawl chinah Serie A point kua hmuh theih aṭangin point sarih an hmu a, season thara Champions League khelh tum an nih avangin khualmual aṭanga point thum hlawhchhuah ngei an tum ang.