Goa leh Punjab chak chiang

Indian Super Cup chu Thawhṭanni zan khan khelh chhunzawm a ni a, FC Goa leh Punjab FC ten an khingpui ve ve 3-0 in an hneh. Goa hian I League club Gokulam Kerala chu 3-0 in an sawp a, Punjab hian anmahni ang thoa ISL club Odisha chu 3-0 in an sawp ve bawk.

Kalinga Stadium-a inkhelah Goa tan Iker Guarrotxena chuan hattrick a siam a, a goal hmasa ber hi penalty aṭanga a khung a ni. Gokulam-in a chhanletna tur an neih loh avangin ISL club an chak chiang - Ayush Chhetri chuan Goa tan hian inkhel bul a ṭan a, quarterfinal an lut.

Thawhlehni zan inkhelah Punjab chuan 3-0 in Odisha an sawp bawk a, Asmir Suljic, Pulga Vidal leh Nihal Sudeesh ten goal khat ṭheuh an khung a, Odisha-in anmahni khelmualah goal an khung ve lo!

Odisha tan Jerry Mawihmingthanga chuan si phurh sut theihna remchang nei mah se hnai set sawt aṭangin a khung lo a, a uiawm takzet - Jerry hi K. Lalṭhathanga (Puitea) nen bench aṭangin an lut a, Isak Vanlalruatfela chuan inkhel bul a ṭan bawk.

Super Cup hi nizanah inkhel a awm lo a, vawiinah khelh chhunzawm tur a ni. Bengaluru chuan tlai dar 4:30-ah Inter Kashi an hmachhawn dawn a, an chak chuan I League club an tla fai dawn tihna a ni.

Bengaluru hian Lalremtluanga Fanai an kawl a, Inter Kashi-in Edmund Lalrindika an kawl thung. Zan dar 8:00-ah Mumbai City leh Chennaiyin an inkhel dawn - Mumbai-in Lallianzuala Chhangte, Daniel Lalhlimpuia leh Hmingthanmawia Ralte (Valpuia) an nei a, Chennaiyin hi Laldinliana Renthlei, PC Laldinpuia leh Lalrinliana Hnamte (Terina) te kawltu an ni thung - Dinliana hi hliam vangin a chawl mek thung.