Arsenal an relegate lo ang - Lampard

Kum dang ang chu ni se December 26 tlaiah chuan ruai kan ṭheh luih luih ang. Kuminah erawh Covid-19 vangin ruai ṭheh ni a awm thei lo, ruai ṭheh awm lo mah se Premier League erawh an khelh chhunzawm dawn.

Zanin dar 11:00 hian Emirates Stadium-ah Chelsea an lenglut dawn a, Blues manager Frank Lampard chuan an khingpui tur Arsenal chu Premier League aṭanga an tlak (relegate) a rin loh thu a sawi!

Arsene Wenger an hnawl hnuah Arsenal an la tho chhuak pangngai thei lo. Season kal laiah phei chuan champion an tum ngam lo a, season thara Champions League khelh phak pawh an sawi ngam tawh meuh lo.

League match 14 an khelh aṭangin point 14 chauh an nei a, table-ah 15-na dinhmun an luah. Tlahniam thei china awm Fulham nen an inthlauhna chu point li chauh a ni.

Mikel Arteta naute hian sawisel an hlawh a, football khawvela hming langsar ṭhenkhat chuan tih el deuh takin an relegate mai an rin thu an sawi hial - Gunners fans tan thu ngaihnawm a ni lo ang.

Chelsea manager Lampard chuan, "Arsenal hi team ṭha tak, manager ṭha takin a kaihhruai a ni a, an relegate ka ring lo. Tun season chu club dang pawhin result mak tak tak an nei fo," a ti.

Everton leh Wolves an hneh loh hnuah Chelsea an insiamṭha leh tawh. Blues hian an match hnuhnung berah West Ham 3-0 in an hneh a, London Derby boruak an ngam - zaninah pawh chak tura rinkai zawk an ni dawn.

Chelsea hian point 25 neiin pangana dinhmun an luah a, hmahruaitu Liverpool an phak lohna chu point ruk a ni; season chanve an la hman tlin loh avangin nomawi an la beisei ngam ang.

Lampard-a'n an ṭhat dan berin a naute a rem theih a rinawm loh. Ben Chilwell leh Reece James te dinhmun a la chiang lo a, an khingpui tur striker Pierre-Emerick Aubameyang pawh hliam damkawr a nih avangin a dinhmun a chiang bik lo.

A inlan chhuna khel ṭha thei tak winger Hakim Ziyech chu malpui hliam vangin a la inlan thei dawn lo - Gunners tlarhnung tan thu hriat nuam a ni ang. Match thum hrem tawk Granit Xhaka erawh a lo kir leh tawh thung ang.