Fitness culture hi Mizote zingah tuh kan duh - Sports Minister

Aizawl International Half Marathon 2025 (AIHM2025) official t shirt chu nimin khan sport minister Lalnghinglova Hmar chuan a tlangzarh. AIHM2025 hi April 26, Inrinniah neih a ni dawn a, Athletic Federation of India pawmpui niin, lawmman atan cheng nuai sawm dah a ni.

Lalnghinglova Hmar chuan, "International Half Marathon hian Mizo mipuite hriselna lamah min tiharh leh se kan duh a, 'Fitness Culture' hi Mizote zingah tuh kan duh a; chutiang beiseina nen chuan he inelna hi buatsaih a ni," tiin a sawi.

Sports minister leh Tourism minister ni bawk Tetea Hmar chuan sawi chhunzawmin, "AIHM2025 hmangin Mizoram hi khawvel marathon map-ah ziah luh a ni ve tawh dawn a, kum lehah pawh neih kan tum dawn a, hma kan sawn zel chuan hun rei lo têah Mizoramah international marathon buatsaih kan tum a. Hei hian Mizoram tan khualzinmite hip kawng thleng pawhin hmasawnna min siam sak kan beisei a ni," tiin hmathlir thui tak an nei.

AIHM2025-ah hi category pali half marathon (21.1 km), open race ( 10 km), fun race (5 km) leh junior category (5 km)-ah te ṭhen a ni. Registration tiduh tan www.aihm2025.com kaltlangin a la tih zel theih a, zanin dar 6:00-ah khar a ni ang. Inziahluh man hi tualchhung mite tan Rs 799 a ni a, naupang tan Rs 99 chauh niin ram pawn mite tan USD 30 a ni thung. Zawhfiah duh nei tan 9863081655-ah biak pawp theih a ni.

Tlanna tur hi Aizawl khawpui chhuahlam World Bank Road-ah neih a ni dawn a, a bul ṭanna leh tawpna tur chu RG Stadium, Mualpuiah a ni ang. Zing dar 5:30-ah RG Stadium thlen hman tur a ni a. Warm-up hi zing dar 6:00-ah neih a ni ang a, intlansiak hi zing dar 6:30 AM-ah ṭan a ni ang.