A tawpah Man City chak hram
Hun tawp dawna Matheus Nunes-a goal khung hmangin Manchester City chuan Aston Villa chu 2-1 in an hneh a, goal hnuhnung an khung leh hun tawp hnua Pep Guardiola awm dan chuan point thum an ngaihhlutzia a tilang chiang hle.
Etihad Stadium-a inkhelah Bernardo Silva chuan minute sarihna lekah goal hmahruai a khung a, mikhual lamin Marcus Rashford-a penalty hmangin an sut, hun tawp dawnah Nunes chuan chakna goal a khung.
Man City hian Premier League match 34 an khelh aṭangin point 61 an hmu a, pathumna an ni mek. An hneh tak Aston Villa hi pasarihna an ni mek - City nen an inkarah point li chauh a awm, an la inhlat lo hlawm hle a ni.
City an chak
Team pahnihte hi FA Cup semifinal lut tawh ve ve an a ni a, nomawi inchuh thei dinhmunah an ding - team ṭha an ni. A tir aṭangin inkhel a hmuhnawm nghal, mual sir lam aṭangin Man City hian an nawr na hle.
Mahse, Villa forward Rashford a hlauhawm hmasa - England international hian box chhunga ball a lakluh hnua a shot chuan goal ban a per a, ball per hi pawn lamah chhuakin, mualneitu lam an him hram rih phawt.
Mual sir aṭanga ball an cross chu lo dang per deuh mah se Silva hma zawnah tak a kal a, goalkeeper Emiliano Martínez-a'n dansak mai tura a lan laiin a nem chhuak fuh tawk lo, ama ke nen perin an lamah a lut zui.
City defender Ruben Diasjacob Ramsey a tihtluk avangin penalty a chawi zui, a tirah penalty pe nghal mai lo mah se VAR hman hnuah pek a ni, a pettu Rashford chuan inringtawk tih hriat tak maiin goal kilah a khung.
Ball chang tama inkhel thununtu Man City lamin an khung belh thei mai bik lo. A tawpah erawh Jeremy Doku chuan chak zetin Axel Disasi a tlan pel a, chumi hnuah Nunes tana khung nuam tawk tur chiahin a siamsak, an chak zui nghal bawk.
Pep a lawm
Manchester City manager Pep Guardiola chuan, "Aston Villa hi team ṭha tak an ni, an ṭhatzia chu Paris Saint Germain leh Newcastle United laka an chet dan khan a tifiah, anni lak aṭanga point thum hmuh hi a lawmawm takzet.
"Champions League khel phak nih a pawimawh a, theihtawp pawh kan chhuah. Chutihrual chuan chiai loa awm theih a pawimawh, league match khelh hmabak pali hi final vek a ni tawh tih kan hriat a ngai," a ti a, tha thlah an tum lo.
Man City hian mikhual vawi hnih an la thleng dawn a, khualmualah match hnih an la hmabak bawk - FA Cup an la khel dawn bawk a, season an hman ṭhat loh kumah pawh nomawi chawi theih an la nei tho tihna a ni.
Aston Villa manager Unai Emery chuan, "Minute 90 chhung ṭha takin kan khel thei a, point pawh kan hlawh chhuak teuh hle, a tawpa tihsual pakhat kan nei zauh kha a pawi lai chu a ni, match dangah chuan thleng tawh lo se.
"Elpui kan nei tam a, team ṭha tak tak vek an ni. Chuvangin, club lian zinga inlan kan duh a nih chuan kan hun ṭha neihna kan bawhpelh thiang tawh lo," tiin a sawi. An hmachhawn leh tur zingah Tottenham leh Manchester United te an la tel a ni.