Jeje-a'n a club hlui a tawng dawn

Indian Super League club-ten Krismas chawlh zan hnih an hman hnuin zaninah match en tur a awm leh dawn ta a, Jeje Lalpekhlua khelhna East Bengal chuan Mizo Sniper hming lo chher tawhna Chennaiyin FC chu zanin dar 7:30-ah hian an hmachhawn dawn. 

Hnahthial tlangval Jeje hian tun season ṭan dawna East Bengal a zawm hma khan ISL club dang tan a la khel ngai lo a, Chennaiyin FC-ah season ruk hun a hmang hman - season khat erawh hliam vangin a inlan lo tawp thung. 

Jeje hian hetih chhung hian Chennaiyin tan match 72-a khelhah goal 23-a khungsak a, assist vawi sarih a nei a, league nomawi vawi hnih a chawipui bawk - zanin an inkhel tur hi Jeje tan chuan lungti lengtu a tling ang. 

East Bengal-ah hian Jeje bakah Lalramchullova chu Mizo player awm a ni a, Armed Veng tlangval hi season ṭan dawn a hliam avangin a la inlan lo thung.

ISL-a an season hmasa berah East Bengal hian beisei an phak lo a, league match ruk an khelh tawh aṭanga point hnih chiah neiin table mawng phah an luahluam mek - Kolkata club hian tun hnaiah Indian player pakua chhuah turin thutlukna an siam a, Balwant Singh, Gurtej Singh, Rafique Ali Sardar, Eugeneson Lyngdoh, CK Vineeth, Samad Ali Mallick, Abhishek Ambekar, Mohammed Irshad leh Anil Chavan-te chuan East Bengal hi an chhuahsan ang. 

East Bengal hmachhawn tur Chennaiyin an ropui lua bik lo - table-ah pariatna an ni mek a, match ruk an khelh tawh aṭangin point riat chiah an la nei. South Indian club hian Lalchhuanmawia Fanai, Jerry Lalrinzuala leh Lallianzuala Chhangte chu Mizo player an kawl mek an ni.