Man United-in Wolves striker Cunha an ngaihven
Nipui bazar hun atan Manchester United an inpuahchah ṭan a, tlarhma tih chak nan Wolves forward Matheus Cunha an ngaihven. Brazilian forward release clause hi £62.5mtd a ni a, season tawpah Molineux stadium a chhuahsan ngei tura ngaih a ni.
Ruben Amorim-a hote hian tun season-ah result an nei ṭha lo a, tlarhma an neih chak tawk loh vangah an ngai. Man United hian tun season Premier League-ah goal 38 chauh an khung a, anmahni aia goal khung tlem hi team nga chauh an awm. Chungte chu Southampton, Leicester City, Ipswich, Everton leh West Ham te an ni.
A fuh em?
Amorim-a'n 3-4-2-1 formation a hmang nasa a, Cunha hi attacking midfielder pahniha awm thei tura ngaih a ni. Vitor Pereira hnuaiah Wolves hian 3-4-2-1 formation ang tho an hmang a, Cunha-a'n inelna hrang hrangah goal 16 khungin club top scorer a ni mek.
Brazilian forward hian Wolves tan match 87 aṭangin goal 32 a khung a, goal khung kawngah chhe hran lo mah se tun season-ah ṭum hnih hnawhchhuah a nih avangin hrem vangin match ruk a khel lo. Premier League club dang Liverpool, Arsenal, Chelsea leh Newcastle te pawhin Cunha hi an ngaihven a, hei vang hian a 'release clause' a lakchhuah a ngaih ngei a rinawm.
Tun season-a an khelh dan aṭanga thlir chuan Cunha hi United forward pahnih Rasmus Hojlund emaw Joshua Zirkzee emaw ai chuan a ṭha chiang. Mahse, Cunha telna Wolves hi Man United hnuaia awm an ni a, team khai chhuak thei tur khawp player niin a lang lo thung.
Buaina a awm!
Man United sum dinhmun a ṭha tawk lo a, Sir Alex Ferguson awm loh hnuah sum an hman nasat avang leh khelmuala hlawhtlinna an neih meuh loh avangin duh ang player la thei an ni tawh lo.
Tuna an player melh Cunha pawh hi Europe club ṭha te awh rawn tir tur a ni lo a, an player melh dang nia an sawi pawh Ipswich Town striker Liam Delap a ni. Kum 22 mi Delap hian tun season league-ah goal 12 a khung a, season khata goal 10 a khung tlinna hmasa ber a ni chauh.
Mahse, Cunha lalut tur pawh hian Man United-in sum hman tur a nei em tih hi zawhna a awm. Nipui transfer-a player ṭha la lut turin Amorim-a hote tan Europa League an champion hi a pawimawh a, match thum khelh hmabak la awm hi an hman ṭhat a pawimawh hle.
English club semifinal-ah Athletic Bilbao an hmachhawn dawn a, final an thleng a nih chuan Tottenham leh Bodo/Glimt inkhela chak zawk an hmachhawn dawn. Nomawi an chawi a nih chuan nipui bazarah hmalak a awlsam hret ang.
Mamawh a tam
Tun season an khelh dan aṭanga a lan dan chuan Man United-in forward chauh an mamawh lo a, position dang pawh an mamawh tel. Wing back, centre midfielder leh centre back te chu an mamawh chiang a, goalkeeper thleng pawhin an mamawh theih dan a awm.
Amorim-a'n a awm sa a hmang thiam a nih loh chuan Man United tan insiamṭhat nghal mai a harsat a rinawm a, season thara Premier League nomawi beisei ngam tur niin an lang lo.
Chutirhualin Portuguese manager chhawr duh loh pahnih Antony leh Marcus Rashford te chu an khelhna Real Betis leh Aston Villa tan an khel ṭha a, team inngahna an ni ve ve. Man United hian sum ṭha hnem tak senga an player lak khawm tawh player-te rem khawm dan an thiam a ṭul pawh a ngai ngei ang.