Super Cup - last 16 khel zo dawn

India rama club football inelna ngaihhlut hlawh, Indian Super Cup last 16 chu zanin hian khelh zawh a ni dawn a, ISL club pali an inlan dawn.

Tlai dar 4:30 hian NorthEast United leh Mohammedan SC an inkhel ang a, zan dar 8:00-ah Jamshedpur leh Hyderabad an inkhel dawn thung - he thu buatsaih a nih lai hian nizan result kan hre hman lo.

Highlander hian beisei phak baka ISL season hmangin, playoff hial an inpetkai a, uiawm takin Jamshedpur an ngam lo. An rilru na thawidam nan Super Cup-ah champion an tum dawn a, Mohammedan SC lakah ṭhat chhuah an tum lo ang.

Hetihlai hian Mohammedan hi an talbuai mek. Kolkata club hi season hmasa khan I League-ah an champion a, ISL khel turin an inpetkai. Mahse, season thara ISL khel chhunzawm thei lo dinhmunah an ding mek.

ISL enkawltu Football Sports Development Limited (FSDL) chuan tun thlatir khan Mohammedan hi lehkha thawnin, hun tiam chhunga club sum dinhmun leh thil ṭul pawimawh dangte FSDL hnena hriattir loah an puh a, ni sarih chhung ziaka chhanglet ngei turin an hriattir.

Mohammedan-ah hian BunkerHill Private Limited chu kum 2020 aṭang khan investor niin an awm tawh a, anni hi tun season-a an thawhpui, Sharachi Sports nen inhmu thiam loin, Sharachi hi an inhnukdawk.

Sharachi inhnuhdawh avangin Mohammedan hi sum lamah an talbuai zui a, season laihawlah khan coach Andrey Chernyshov chuan Kolkata club hi a chhuahsan. Kum 57 mi coach hian, "Professional ka nihna angin thla thum chhung hlawh la loa hnathawh ka thei lo," a ti.

Mohammedan hian player hlawh pawh an pe ṭha thei lo a, training pawh zawm duh loin player-te hi an lo nuar tawh hial - zaninah pawh Kolkata club hian an player neih ṭhat an thawhchhuahpui thei lo mai thei a, season thara ISL an khelh dawn leh dawn loh pawh a chiang lo.

Zanin dar 8:00-ah match hnuhnung zawk khelh tur niin, Khalid Jamil-a enkawl Jamshedpur leh Hyderabad an intawng dawn.

Men of Steel hian C. Lalhriatpuia an kawl a, Hyderabad-ah hian keeper Lalbiakhlua Jongte, midfielder Aron Vanlalrinchhana, Isaac Vanmalsawma leh forward Ramhlunchhunga te chu Mizo player tel an ni.