Barcelona tan champion a hnai zel

La Liga-ah match nga chiah khelh tur a awm tawh a, Barcelona-in point liin hma an la hruai mek - Thawhlehni zan khan Barca hian an mikhual Real Mallorca chu 1-0 in an hneh a, hma an hruai chhunzawm zel.

Barcelona tan Dani Olmo chuan inkhela goal awmchhun a khung a, Mallorca-in an mikhualna ramah goal an khung ve theih loh avangin Catalan club tan champion a hnai.

Hansi Flick-a naute tan thlamuang taka awm hun erawh a la ni lo. A hnuai chiaha awm hi Real Madrid an ni a, club pahnih hi La Liga-ah an la intawn dawn avangin champion tur a la chiang lo - Real hi nizan khan an inlan a, an result kan hre hman lo.

Barca an chak leh tak avangin kartawp inkhela chak lo Atletico Madrid tan erawh champion beiseina a tawp tiin a sawi theih a, La Liga champion chu Barca emaw Real emaw an ni ngei dawnin a lang.

A harsa

Mahni muala inlan ni mah se, Barcelona-in goal khung an harsat a, first half chhungin vawi 24 ngawt 'shot' nei mah se Mallorca goalkeeper Leo Roman chet ṭhat zan a ni a, an khung thei lo.

Barca tan Lamine Yamal, Ferran Torres leh Olmo ten first half chhungin goal khungna chance nei mah se Mallorca keeper Leo Roman chuan ṭha zetin a dansak vek a, Barca an vanduai.

Hei chauh a ni lo - Gavi chuan uiawm takin post a pet per a, Ronald Araújo pawhin hnai tak aṭangin a thlawh over a, Pedri leh Hector Fort te pawh an vanneih zan a ni lo.

Mallorca hian counter-attack aṭangin goal an khungah an inngai a, mahse, right back Mateu Morey-a goal khung hi offside vangin pawm a ni lo - goal lut loin chawlhlawk hman a ni.

A hming Olmo

Barcelona an vanduai reng bik lo. Second half an ṭan a, minute khat pawh a liam hman lo - Olmo a inlar a, Eric Garcia siamsak chu Spanish midfielder hian goal-ah a chantir a, Barca-in an lakluh chhan a pholang.

Nipui transfer-a euro maktaduai 60-a Barca pantu Olmo hi Catalan club a pan hnuah hliam vangin a talbuai fo a, Barca sum dinhmun avangin inkhel chhunzawm thei lo dinhmunah te hial a ding leh rih ṭhin!

Mahse, Spain international hian khelmualah a 'quality' a pholan chhunzawm zel a, tun season-ah Barcelona tan inelna hrang hrangah match 31 khela goal 10 khungin, assist vawi ruk a nei tawh.

Barcelona hian April 26, Inrinni zanah Copa del Rey final Real nen an khel dawn a, hei vang hian Flick-a'n an league match hnuhnung ber aṭangin player pasarih ngawt a siksawi a, goal khung an harsat meuh chuan a luh belhtir nual - a tawpah erawh an chak ta tho a, vawi 40 ngawt shot an neih chu tun season La Liga record a ni.