Doncic hoin Lakers an chak

NBA playoff khelh laiah Los Angeles Lakers chuan Luka Doncic-a point 31 neih hmangin Minnesota Timberwolves 94-85 in an hneh. Western Conference first round playoff-ah team pahnih te 1-1 in an inhnehtawk ta chiah.

Lakers hi an match hmasa zawkah an chak lo a, insiamṭhat an mamawh. Hun pawimawhah Donvic rawn inlarin quarter hmasa berah point 16 a nei nghal, an dinhmun siamṭha in a chak theih chhan a ni.

LeBron James-a'n point 21 a neih bakah rebound vawi 11 a la a, ani bakah hian point 16 neitu Austin Reaves a langsar bawk. April 26, Inrinni zing dar 7:00-ah game 3 an khel zui leh ang.

Lakers chak puitu Doncic chuan, "Kan match hmasa zawkah khan a bul ṭan fuh loh pawizia kan hre chiang tawh a, tun ṭumah chuan a tirah kan che fuh ta zawk. Minute 48 kan khelh chhung khan team ṭha zawk kan ni," tiin a sawi.

Nimin zing inkhel dangah Milwaukee Bucks chuan Indiana Pacers chu 123-115 in an hneh a, match hmasa zawkah an lo chak tawh bawk avangin best of seven series khelh turah 2-0 in hma an hruai fal a ni.