Delhi Capitals an che ṭha zel

Indian Premier League-ah Thawhlehni zan khan Delhi Capitals-in Lucknow Super Giants wicket riatin an hneh a, table-ah pahnihnaah awmin an chunga awm Gujarat Titans nen an point hmuh zat a inang.

Ekana Cricket Stadium B Ground-ah ṭhum vawra vannei Delhi-in vawm hmasak an thlang. Super Giants tan opener pahnih Aiden Markram (52) leh Mitchell Marsh (45) te che chhe lo mah se middle order lam an che ṭha lo. Ayush Badoni-a'n ball 21 lek aṭanga 36 runs rawn siam ve bawkin 159/6 runs an siam hram.

Delhi tan target hautak a ni lo a; Abishek Porel (51), KL Rahul (57*) leh Axar Patel (34*) te che ṭhain over 17.5 lekah 161/2 runs siamin wicket riatin hnehna an chang. Zanin dar 7:30 hian Royal Challengers Bengaluru leh Rajasthan Royals te an inkhel leh ang.