Liverpool-ah Salah a hlim

Premier League champion Liverpool manager Jurgen Klopp chuan tun hnaia Anfield-a hlim lo anga an sawi Mohamed Salah chu a hlim thu a sawi a, German coach thusawi hi rin tur a nih chuan Reds fan-te tan hlauhthawn tur a awm lo. 

Salah hian Spanish chanchinbu Diario AS nen an inkawmaah Champions League-a FC Midtjylland nen an inkhelh ṭuma captain a nih loh vanga a lawm loh thu a sawi a,  Barcelona leh Real Madrid nena sawizawm a nih chungchangah chiang taka phatna a nei lo bawk. 

Mahse, Jurgen Klopp chuan, "Mo hi tunah chuan a hlimin nuam a ti em em a, chu chu ka tana pawimawh ber chu a ni. Vawiina kan training lai thlalak kan nei rih lo a, inhmu a nih ngat chuan a nuih nasatzia pawh hmuh turin a awm ang. 

"Media tan chuan thil chhehvel ziah hi thil nuam tak a ni mai thei a, mahse, club chhungkaw lamah erawh eng buaina mah kan nei lo," a ti. 

AS nena an inkawmna a chhuah hnuah Salah hian Crystal Palace chu Reds tan bench aṭanga tlan lutin a hmachhawn leh tawh a, 7-0 a an chakna inkhelah hian goal hnih a khung- tun season Premier League-ah goal 13 ngawt a khung tawh. 

Egyptian forward hian goal 13 khung tur hian league match 13 lek a mamawh a, assist vawi thum a nei bawk - tun season Premier League-ah ani aia khung hnem an awm rih lo. 

Liverpool hian season thum chhunga a zawna a vawi thum nan Premier League-ah hma an hruai mek a,  Pathianni zan dar 10:00-ah league match khel turin West Brom an mikhual ang.