Man City leh Aston Villa inlan dawn

FA Cup semifinal hmasa zawk chu zanin dar 9:45 hian khelh a ni dawn. Wembley Stadium-ah Crystal Palace leh Aston Villa te an intawng dawn, inhnehtawk a awm thei lo, knockout a nih avangin final lut tur an chingfel nghal ang.

Pathianni zan dar 9:00-ah Manchester City leh Nottingham Forest te an inhmachhawn ve thung dawn, team pahnih hi Premier League lamah pawh pathumna nih tuma inum lai an ni a, inkhel a hmuhnawm ngei dawn.

Villa fiahna

Unai Emery-a'n a enkawl chinah Aston Villa hi team hlauhawm an ni, mahse team ṭha an nihna fiah turin nomawi an la chawi lo - FA Cup hi an lak theih hnaivai ber a ni, champion turin vawi hnih chak an la hmabak.

Spanish manager Emery hian Sevilla, Villarreal leh Paris Saint Germain a enkawl laiin nomawi a chawi vek - Arsenal erawh a champion pui lo; English club dang Villa hi 2022 aṭang khan a enkawl a, tun hi a tan hun ṭha a ni.

Aston Villa hi tun hnai inelna hrang hranga an match hnuhnung 13-ah vawi 11 an chak thei a, goal 32 khungin goal chhuah lohna match paruk an nei. An tlarhma a hriamin an hnung lam pawh an phui ṭha viau tih a hriat.

EPL lama Man City nen an inkhelh ṭumin Emery chuan, tlarhma laiah Ollie Watkins aiin Marcus Rashford chu a awmtir a, sawiseltu an awm. Mahse, Manchester United aṭanga loan hmanga an hawh lai hi a khel ṭha a, zanina pawh a hmel kan hmuh nawn a rinawm.

Villa tana fimkhur ngaihna erawh Crystal Palace laka an sulhnu ṭha tawk lo hi a ni. Inelna hrang hranga an intawn hnuhnung paliah chak ni hmel an hmu miah lo, vawi thum an tlawm, an sulhnu ṭha lo thaibo an tum ang.

City beiseina

Premier League nomawi an chan a, Real Madrid hneh loin Champions League aṭangin an tla bawk - season an hman ṭhat loh thuam mawi theihna awm chhun chu FA Cup champion nih chauh a ni tawh, an tan match pawimawh a ni dawn.

Man City midfielder Ilkay Gundogan chuan, "Season kan hmang ṭha tawk lo tih chu thil chiang a ni. Thil tum pahnih kan la nei, pakhat chu UCL khel tura tlin a ni a, pakhat chu FA Cup final luh a ni bawk," tiin a sawi.

Season tawp rualin midfielder ṭha Kevin de Bruyne a chhuak dawn a, Belgium international hian a hun hnuhnungah nomawi chawi a châk dawn. City tana a title hnuhnung ber tur a nih bawk avangin a ngai thutak hle ang.

Man City tan Notting-ham Forest hi awlsam taka nuai liam chi erawh an ni dawn lo. Nuno Espirito Santo naute hian EPL-ah goal 39 an chhuah a, an khingpui tur Man City (43) aiin an chhuah tlem zawk, tlarhnung phui hi an hmachhuan tur a ni ang.

Forest manager Nuno chuan, "Season tirah kha chuan mi rin kan hlawh lo, sang taka kan awm ve pawh khan engtikah emaw chuan kan la hniam leh mai ang tiin an sawi ṭhin, mahse hei leh chen hi kan kal tawh, a tawp khar kan tum ang," tiin a sawi.