A zawna vawi thum chak Thunder

Oklahoma City Thunder chuan nimin zing khan Memphis Grizzlies 114-108 in an hneh a. NBA Western Conference playoff khelh laiah an che ṭha hle, best of seven series an khelh turah 3-0 in hma an hruai mek.

A tir lamah Thunder hi an che ṭha mai bik lo, chawlhlawk an hman lai chuan point 26 ngawtin an hniam zawk. Mahse, seeded pakhatna hian a hnu lamah team ṭha an nihna lantirin an tho chhuak a ni.

Grizzlies an vanduai ve bawk, an boruak fuh vanglai takin point guard Ja Morant a inhliam, point 29 nei hman mah se a khel chhunzawm thei lo. Zanin dar 1:00-a game 4 an khelh tur atan pawh Morant hi a dinhmun a chiang ta lo.

Inkhel dangah New York Knicks chuan Detroit Pistons chu 118-116 in an hneh. Knicks tan hian Karl-Anthony Towns, Jalen Brunson, OG Anunoby leh Mikal Bridges te chuan point 20 an nei tling vek a, series-ah 2-1 in hma an hruai.