NorthEast-in Mohammedan an sawp

Indian Super Cup-ah quarterfinal lut a hriat kim ta a, Ningani zan khan NorthEast United leh Jamshedpur FC ten an khingpui ve ve hnehin, quarterfinal an lut ve leh ta.

Highlander hian Mohammedan SC chu 6-0 ngawtin an sawp a, ISL best player Alaaeddine Ajaraie chuan hattrick siamin, a goal thumna hi hun pek belha penalty aṭanga a khung a ni.

Ajaraie bakah hian Jithin MS, Nestor Albiach leh Guillermo Fernández ten goal khat ve ve an khung a, hun tawp thlengin goal dang a lut tawh lo - Mohammedan tan hian Lalremsanga Fanai chu a inlan a, Lengpui tlangval hian a team a chhan thei bik lo.

ISL lama season duhawm tak hmangtu Jamshedpur pawh an kal zel a, Hyderabad FC chu 2-0 in an hneh - Javier Siverio (penalty) leh Stephen Eze ten goal khat ve ve an khung a, Hyderabad-in a chhanletna tur an nei lo.

Hyderabad tan Isaac Vanmalsawma chuan inkhel bul ṭanin, Ramhlunchhunga chu bench aṭangin a lut bawk. ISL quarterfinal hi vawiin aṭangin khelh leh nghal tur a ni a, Pathianni zanah an khel zo ang - vawiin tlai dar 4:30 hian Kerala Blasters leh ISL nomawi chawitu Mohun Bagan an intawng dawn.