Maresca dinhmun a derthawng?

Chelsea manager Enzo Maresca chu ban mai theih dinhmunah a ding niin khawthlang chanchinbu ṭhenkhat chuan an tarlang a, season a hman zawh dan a zirtin Italian manager hian a hna ngai a chelh emaw chelh chhunzawm lo emaw a ni ang.

Vawiin tlai dar 5:00 hian Chelsea chuan Premier League khel turin Everton an mikhual dawn. Blues hi parukna an ni mek a, khelh zat inangah an chunga mi Newcastle United chu point hnihin an phak lo.

EPL aṭanga Champions League khelh tumte an inhnaih hlawm hle. Chelsea leh pathumna Manchester City inthlauhna pawh point li chauh a ni a, an inkarah Magpies leh Nottingham Forest an awm bawk.

Maresca hian nikum nipui lai khan Mauricio Pochettino thlakin Chelsea hi a enkawl ṭan a, tun hma lamin Leicester City chu ṭha takin a lo kaihruai tawh, a lakah beiseina an neih san avangin kum nga daih inremna an ziak.

A tir lamah Maresca leh a naute an khel ṭha viau, mahse season an hman rei hnuah an zuih. Tuna an tana pawimawh hmasa chu UCL khel tura tlin leh Europa Conference League champion nih a ni ang.

Chelsea elpui zinga mi Newcastle United chuan zanin dar 7:30 hian Ipswich Town an mikhual dawn thung. Magpies hi an coach Eddie Howe a dam tawh a, pneumonia vanga enkawl a nih reng hnuah hna a chhunzawm leh tawh.

Howe hian Manchester United, Crystal Palace leh Aston Villa an hmachhawn ṭumin a naute a kaihruai thei lo. Howe chuan, "100% chu ka la ni lo, mahse hna ka thawk leh thei ta hi ka lawm," a ti, zaninah a naute a enkawl thei tawh dawn a ni.