Real Valladolid an tla

Brazilian striker ropui Ronaldo club Real Valladolid chu tun season-a relegate hmasa ber an ni - Ningani zan khan Real Betis chuan Valladolid hi 5-1 ngawtin an sawp a, Antony khelhna Betis erawh season thara Champions League khel thei dinhmunah an ding mek.

La Liga-ah table-a pangana chinin season tharah Champions League an khel dawn a, Betis hi pangana an ni mek - parukna Villarreal aiin point hnih chauhin an sang thung a, vawi khat chetsual a la pawi thei.

Mualneitu Betis tan Jesús Rodriguez, Cucho Hernández, Isco, Romain Perraud leh Abde Ezzalzouli ten goal khat ṭheuh an khung a, Valladolid tan Chuki chuan goal khat khung vein, mualpho zualpui a khuh.

September 2018 khan Ronaldo chuan Valladolid hi leiin, 82% share a nei a, mahse, club neitu a nih chhungin tun hi an vawi thum relegate-na a ni! Valladolid hi 2020-21 leh 2022-23 season-ah te khan an lo relegate tawh bawk a, mahse, Segunda division-ah season khat chauh an awm hman tihin La Liga-ah an inpetkai lehnghal.

Valladolid hi tun season-a league match 33 an khelh aṭangin vawi li chiah an chak ve a, vawi li an khingpui inhnehtawkpuiin, point 16 chiah an la nei - goal 24 chiah an khung a, goal 81 ngawt an chhuah thung!

Ronaldo chuan Valladolid hi hralh a tum reng nia sawi a ni a, fans sawiselna a tawk nasa bawk. Club ṭantute chuan Real Madrid striker hlui hian an club chu a ngaihtuah tawk loah an puh a, neitu thar neih an duh - an relegate zui tak avangin club hlutna erawh a tlahniam sawt ang.

Valladolid hian tun season-ah coach pathum an nei hman a, Diego Cocca leh Paulo Pezzolano te an ban hnuah, an club player hlui Álvaro Rubio chuan February thla aṭang khan a enkawl ṭan a, an relegate ta tho a ni.

Rubio chuan, "Eng chhuanlam mah siam thei kan ni lo. First division club khelh dan tur angin kan khel lo a, kan thiam loh a ni, tih hi kan pawm ngam a ṭul. Tho chhuak leh a, mualpho loa season khar kan tum ang," a ti a, tla chiang tawh mah se, season tawp thlenga tha thlah loa an beih a ṭul thu a sawi.

Ningani zan inkhel dangah Atletico Madrid chuan 3-0 in Rayo Vallecano an sawp a, Alexander Sørloth, Conor Gallagher leh Julián Álvarez ten goal khat ṭheuh an khung.

Atletico tan champion tur erawhin thilmak a thlen a ngai tawh thung a, match nga chiah khelh tur awm tawhah hmahruaitu Barcelona chu point 10-in an phak lo mek.