AC Milan hmachhawn tur Bologna

Italian Cup final khel tur a chiang ta. Ningani zan khen semifinal hnuhnung zawk khelh zawh niin, Bologna chuan Empoli 2-1 in an hneh a, an intawn tawhna hmasa nen belhkhawmin 5-1 in an chak.

Semifinal hmasa zawkah AC Milan chuan Inter Milan 3-0 in an lo hneh tawh bawk. May 14 hian a hmawr bawkna neih a ni dawn a, a hmun atan Rome khawpuia khelmual hmingthang Stadio Olimpico a ni ang.

Bologna hian si thum faia hma an hruai sa avangin chak chiang tura ngaih an ni a, minute sarihna lekah Giovanni Fabbian-a hmangin an khung belh, mikhual lamin chawlhlawk hmain Viktor Kovalenko hmangin sut ve mah se, hun tawp dawnah Thijs Dalinga chuan Bologna chak a nemnghet.

Bologna hian Coppa Italia final an khelh hnuhnung ber chu kum 1974 daih tawh kha a ni a, hemi ṭum hian a vawi hnih nan an champion; kuminah a ṭum thumna atan nomawi chawi an tum dawn a ni.

Bologna coach Vincenzo Italiano chuan, "He club hian thil tum leh duhthusam a nei a, chung zinga pakhat chu tihlawhtling thei turin kawng dik kan zawh mek, player mai bakah min thlawp tute vang a ni," tiin a sawi.